İsrail ordusu Suriyanın cənubundakı Kuneytra bölgəsini artilleriya atəşinə tutub.

Suriyanın SANA xəbər agentliyinin noyabrın 18-də yaydığı məlumata görə, ordunun Kuneytranın cənubundakı Tal Əhmər bölgəsinə dörd artilleriya mərmisi atdığı bildirilib. Xəsarət alanlar və ya ziyan barədə məlumat verilməyib.

Hücum İsrail qüvvələrinin Kuneytra və Dera bölgələrində irəliləməsindən bir neçə saat əvvəl baş verib. İsrail ordusu və Suriya hakimiyyəti bu hadisə ilə bağlı dərhal açıqlama verməyib.

Yerli sakinlər İsrailin Kuneytrada keçirdiyi əməliyyatların intensivləşdiyini bildirirlər. Onların məlumatına görə, kənd təsərrüfatı ərazilərinə müdaxilə, yüzlərlə hektar meşəlik sahənin məhv edilməsi, sakinlərin saxlanılması və hərbi nəzarət məntəqələrinin yaradılması halları müşahidə olunub.

Yerli hakimiyyət orqanlarının açıqlamasına görə, İsrail ordusu 2024-cü ilin dekabr ayından bəri Suriyada 1000-dən çox hava hücumu və cənub əyalətlərində 400-dən çox sərhədyanı əməliyyat həyata keçirib.

2024-cü ilin sonunda Bəşər Əsəd rejiminin devrilməsindən sonra İsrail 1974-cü ildə bağlanan ‘‘Ayrılma Sazişini’’ pozaraq silahsızlandırılmış bufer zonasını ələ keçirmiş və Suriyanın Qolan təpələrindəki işğalını genişləndirmişdir.