Tibbi mənbələrin verdiyi məlumata görə, İsrail ötən ilin oktyabr ayından bəri qüvvədə olan atəşkəsi pozmağa davam edərkən, Qəzzada təşkil edilən yeni bir İsrail hücum dalğasında aralarında bir ana və kiçik qızının da olduğu 8 nəfər həyatını itirib, onlarla insan yaralanıb.
Mənbələr “Anadolu” agentliyinə bildiriblər ki, İsrailin Qəzzanın cənubunda, Xan Yunisin qərbindəki Əl-Məvasi bölgəsində məcburi köçkün ailələrin sığındığı çadırları vurması nəticəsində bir ana və qızı həyatını itirib.
Şahidlər hücumun çadırlarda və məcburi köçkün sakinlərin əşyalarında genişmiqyaslı ziyana səbəb olduğunu söyləyiblər.
Bundan qısa müddət əvvəl, İsrailə məxsus pilotsuz uçuş aparatı (PUA) Əl-Məvasidə sahildəki bir çadıra hücum edərək iki fələstinlini öldürüb, 27 nəfəri yaralayıb.
Tibbi mənbələr yaralıların Xan Yunisdəki Nasir xəstəxanasına, həmçinin Küveyt və Əl-Məvasi səhra xəstəxanalarına aparıldıqlarını bildiriblər.
Başqa bir tibbi mənbəyə görə, İsrail qüvvələrinin Xan Yunisin şərqindəki Bani Süheyla yolayrıcı yaxınlığında toplaşan mülki şəxslərə atəş açması nəticəsində daha bir fələstinli həyatını itirib, azyaşlı bir qız uşağı isə yaralanıb.
Qəzzanın mərkəzi hissəsində, Deyr əl-Bəlahdakı əl-Bərəkə küçəsində toplaşan mülki şəxsləri hədəf alan PUA hücumunda biri uşaq olmaqla daha üç fələstinli həyatını itirib, bir neçə nəfər yaralanıb.
Atəşkəs xətləri yenidən çəkilir
İsrail ordusu Xan Yunisin şimal-şərqində bina və obyektləri uçurub və yerli sakinlər şəhərin şərqində yerləşən İsrail hərbi maşınlarının intensiv atəşi davam edərkən, dağıntıların səbəb olduğu böyük partlayış səsləri eşitdiklərini bildiriblər.
Həmçinin yerli mənbələr və şahidlər bir neçə İsrail hərbi maşınının Qəzzanın mərkəzi hissəsindəki Nuseyrat qaçqınlar düşərgəsində Səlahəddin küçəsinə doğru irəliləyərək atəş açdığını və artilleriya zərbələri endirdiyini qeyd ediblər.
Şahidlər Qəzzada "Sarı xətt" olaraq təsvir edilən işğal bölgəsində İsrail ordusuna məxsus hərbi maşınların beton blokları qərbə doğru, Qəzza vadisi körpüsü istiqamətinə təxminən 150 metr aparıldığını bildiriblər.
Sakinlər, həmçinin iyunun 29-da səhər saatlarında Səlahəddin küçəsi boyunca yeni beton maneələrin yerləşdirildiyini fərq etdiklərini və İsrail ordusunun Qəzzadakı işğal sahəsinin genişlənməsinə işarə edən bu vəziyyətin atəşkəs razılaşmasını pozduğunu deyiblər.
İsrail ordusu fələstinlilərin yaxınlıqdakı bölgələrə girişini əngəlləyən, Qəzzanın daxilində yerləşən və “Sarı xətt” olaraq təsvir edilən “təhlükəsizlik zolağı” boyunca yerləşib.
İsrail rəsmilərinin bildirdiyinə görə, İsrail ordusu hazırda bölgənin 70 faizindən çoxuna nəzarət edir.
Qəzzadakı Səhiyyə Nazirliyinin məlumatlarına görə, 10 oktyabr 2025-ci ildə qüvvəyə minən atəşkəsdən bəri İsrailin atəşkəs pozuntuları nəticəsində əksəriyyəti qadınlar və uşaqlardan ibarət olan 1 045 fələstinli həyatını itirib və 3 380 nəfər yaralanıb.
2023-cü ilin oktyabr ayından bəri 73 mindən çox fələstinli həyatını itirib, 173 mindən çox insan yaralanıb və bunlara əlavə olaraq Qəzzanın mülki infrastrukturunun təxminən 90 faizi genişmiqyaslı dağıntılara məruz qalıb.
