İsrail işğal altındakı Şərqi Qüdsdə yeni qeyri-qanuni yaşayış məntəqələrinin tikintisini təsdiqləyib

İsrail işğal altındakı Şərqi Qüdsdə yeni qeyri-qanuni yaşayış məntəqələrinin tikintisini təsdiqləyib.

Yerli media orqanlarının məlumatına görə, İsrailin maliyyə naziri Bezalel Smotriç işğal altındakı Şərqi Qüdsdə 3 600 mənzildən ibarət yeni qeyri-qanuni yaşayış məntəqəsinin planını təsdiqləyib.

B. Smotriç rəsmi sosial media səhifəsində paylaşım edərək bildirib ki, yaşayış məntəqələri Qüdsü şərqdən qorumaq üçün strateji baza rolunu oynayacaq. O, qeyd edib ki, bu tarixi plan İsrailin suverenliyini möhkəmləndirməyə və işğal altındakı İordan çayının qərb sahilində Fələstin dövlətinin yaradılmasının qarşısını almağa kömək edəcək.

İsrail Nazirlər Kabineti həmçinin 12 dekabrda İordan çayının qərb sahilində 19 qeyri-qanuni yaşayış məntəqəsinin tikintisini təsdiqləyərək ilhaq tədbirlərini gücləndirib.

Bu addım BMT qətnamələrinə əsasən İsrail və Fələstindən ibarət iki dövlətli həllin həyata keçirilmə ehtimalını faktiki olaraq aradan qaldırır.

Xatırladaq ki, İsrail 1948-ci ildə Fələstin torpaqlarında qurulub və sonradan Fələstinin digər ərazilərini işğal edib. Sonrakı İsrail hökumətləri geri çəkilməkdən və paytaxtı Şərqi Qüds olan müstəqil Fələstin dövlətinin yaradılmasını qəbul etməkdən imtina ediblər.