Ukrayna hakimiyyət orqanları Rusiyanın Kiyevə raket hücumuna başladığını bəyan edərək, sakinləri təcili olaraq sığınacaqlara sığınmağa çağırıb. Hücum Ukrayna Prezidenti Volodimir Zelenskinin ABŞ Prezidenti Donald Tramp və Avropa liderləri ilə keçirdiyi görüşdən cəmi bir neçə saat sonra baş verib.
Hazırda Ukrayna ərazisinin böyük hissəsində hava hücumu həyəcanı elan olunub. "Reuters" agentliyinin müxbiri paytaxt Kiyevdə güclü partlayış səslərinin eşidildiyini bildirib. Ölkənin şimal-şərqində yerləşən Sumı şəhərinin rəsmiləri isə PUA hücumu nəticəsində bir nəfərin həlak olduğunu açıqlayıblar. Kiyev Hərbi Administrasiyasının rəhbəri Timur Tkaçenko bu sabah "Telegram" kanalında etdiyi paylaşımda sakinlərə müraciət edərək, düşmənin paytaxtı ballistik raketlərlə vurduğunu və hava həyəcanı siqnalı başa çatana qədər hər kəsin təhlükəsiz yerlərdə qalmalı olduğunu vurğulayıb.
Fransada keçirilən G7 sammitində iştirak edən Volodimir Zelenski digər liderlərlə görüşdükdən sonra Donald Tramp və Fransa Prezidenti Emmanuel Makronla da danışıqlar apardığını bildirib. Ukrayna lideri bu görüşü Rusiyanın ölkəsinə qarşı dörd ildən artıqdır davam edən müharibəsinə son qoymağı hədəfləyən “koordinasiya görüşü” kimi xarakterizə edib.
Qeyd edək ki, Donald Tramp dünən verdiyi açıqlamada həm Rusiya Prezidenti Vladimir Putinin, həm də Volodimir Zelenskinin müharibənin dayandırılması istiqamətində addımlar atmağa hazır olduqlarına işarə edib və cəbhədə Rusiyanın Ukraynadan daha çox hərbçi itirdiyini qeyd edib. Kreml isə bu həftə Putinin Trampla son telefon danışığı zamanı Zelenski ilə görüş ehtimalının müzakirə edilmədiyini bildirərək, Ukraynanın müharibədə uduzan tərəf olduğunu irəli sürüb.
