Rekordları alt-üst edən Novak Cokoviç Avstraliyada keçirilən tennis turnirində son 16 mərhələyə yüksələrək “Grand Slam” turnirlərində 400 matç qazanan tarixdə ilk tennisçi olub.
38 yaşlı serbiyalı tennisçi yanvarın 24-də qapalı damlı mərkəzi kortda hollandiyalı Botik van de Zandşulpu 6–3, 6–4, 7–6 (7/4) hesablı setlərlə məğlub edərək “Grand Slam” adlandırılan əsas turnirlərdə qələbə rekordunu daha da irəli aparıb.
Bu göstəricidə N.Cokoviçi Rocer Federer (369) və Serena Williams (365) izləyir.
Əldə olunan qələbə eyni zamanda N.Cokoviçin Melburn Parkdakı 102-ci zəfəri olub. Serbiyalı tennisçi burada qazandığı 10 Avstraliya Açıq çempionluğu ilə təkbətək oyunlar kateqoriyasında R.Federer ilə zirvəni bölüşür.
Qarşılaşmadan sonra açıqlama verən N.Cokoviç deyib: “Gənclərə hələ də çətin anlar yaşatmağa çalışıram. Hələ də buradayam və ayaqdayam. Hazırda Alkaras və Sinner dünyanın ən yaxşı iki oyunçusudur. Hamımızdan fərqli bir səviyyədə oynayırlar. Amma korta çıxdığınız və top oyuna daxil olduğu an hər zaman bir şans var.”
Ötən il “Indian Uells” turnirində N.Cokoviçi üç setdə məğlub edərək sürprizə imza atan Van de Zandşulp bu dəfə oxşar performans sərgiləyə bilməyib. N.Cokoviç ilk setdə 26 zərbədən ibarət uzun ralli sonrası kritik geyi qazanaraq üstünlüyü ələ keçirib.
İkinci setdə də hollandiyalı rəqibinin ilk servis geymini qıraraq 4–2 hesabı ilə önə keçən N.Cokoviç zaman-zaman çətinliklə üzləşib və əsəbi anlar yaşayıb. Bir epizodda əsəblə topu reklam lövhəsinə tərəf vuran N.Cokoviç topun top toplayıcıya dəyə bilmə ehtimalı yarandıqdan sonra dərhal üzr istəyib.
Üçüncü set tay-breykinə gedərkən dözümlülüyü ilə önə çıxan serbiyalı tennisçi görüşü qazanmağı bacarıb.
Qeyd edək ki, N.Cokoviç dördüncü mərhələdə Çexiyanın yüksələn ulduzu Yakub Menşik ilə və ya həddindən artıq isti hava səbəbindən oyunu təxirə salınan Amerikalı turnir debütantı İtan Kuin ilə qarşılaşacaq.
Xatırladaq ki, N.Cokoviç 2023-cü il ABŞ Açıq turnirində qazandığı qələbədən sonra Marqaret Kort ilə birlikdə 24 “Grand Slam” çempionluğu rekordunu paylaşır.
