Azərbaycan Prezidenti İlham Əliyev Avropa Parlamentini Bakı və İrəvan arasındakı sülh prosesinə mane olmaqda ittiham edib. İrəvanda keçirilən 8-ci Avropa Siyasi Birliyinin (ASB) sammitinə videokonfrans vasitəsilə qatılan dövlət başçısı bildirib ki, sözügedən qurum son beş ildə Azərbaycana qarşı təhqiramiz məzmunlu 14 qətnamə qəbul edərək sülhə dəstək əvəzinə qərəzli mövqe nümayiş etdirib. Prezident sonuncu qətnamənin cəmi bir neçə gün əvvəl qəbul edildiyini diqqətə çatdırıb.
Xatırladaq ki, Azərbaycan Parlamenti mayın 1-də Avropa Parlamenti ilə bütün sahələrdə əməkdaşlığı dayandırmaq və Avronest Parlament Assambleyasındakı üzvlüyünə xitam vermək barədə qərar qəbul edib. Eyni tarixdə Azərbaycan Xarici İşlər Nazirliyi Avropa İttifaqının Bakıdakı səfiri Mariana Kuyunçiçi çağıraraq ona "Ermənistanda demokratik müqavimətin dəstəklənməsi" adlı qətnaməyə görə rəsmi etiraz notası təqdim edib. Nazirlik qətnamənin həqiqətləri təhrif etdiyini və dövlətlərin suverenliyi prinsiplərinə zidd olduğunu bəyan edib.
Ermənistanın Baş naziri Nikol Paşinyan İrəvandakı sammitdə çıxış edərək 2028-ci ildə Azərbaycanda keçiriləcək növbəti ASB sammitində iştirak etmək istədiyini bildirib. N.Paşinyan qeyd edib ki, tərəflər gələcək sammitlərə ev sahibliyi etmək üçün qarşılıqlı şəkildə bir-birinin namizədliyini dəstəkləyirlər. Baş nazir həmçinin İlham Əliyevin videokonfrans vasitəsilə də olsa, Ermənistanda keçirilən tədbirə qatılmasını yüksək qiymətləndirib. Avropa Siyasi Birliyi (ASB) formatının bölgədəki əlaqələrə müsbət təsir etdiyini deyən N.Paşinyan bu sammitlərin Türkiyə ilə münasibətlərin qurulmasında mühüm rol oynadığını bildirib. O, hazırda Türkiyə vitse-prezidentinin İrəvanda keçirilən tədbirdə iştirak etdiyini xatırladaraq, bunun Türkiyə rəhbərliyi səviyyəsində Ermənistana reallaşan ilk rəsmi səfər olduğunu vurğulayıb.
