Noyabrın 29-da İstanbulda keçirilən “İlim Yayma” Mükafatları mərasimində çıxış edən Türkiyə prezidenti Rəcəb Tayyib Ərdoğan bildirib ki, Fələstin hərəkatı “Həmas” İsrailin davam edən təxribatlarına baxmayaraq, öz öhdəliklərini səbir nümayiş etdirərək yerinə yetirməyə davam edir.
Ölkə rəhbəri R.T.Ərdoğan həmçinin beynəlxalq media qurumlarını Qəzzada öldürülən jurnalistlərlə bağlı kifayət qədər xəbər yaymadıqlarına görə tənqid edərək deyib: “Qəzzada 270-dən çox jurnalist həyatını itirib, buna baxmayaraq böyük qlobal media qurumları susur.”
Prezident R.T.Ərdoğanın bu çıxışı Türkiyənin “Fələstin xalqı ilə Həmrəylik Günü” çərçivəsində səsləndirilib. Dövlət başçısı R.T.Ərdoğan bu münasibətlə Fələstin xalqının hüquqları və dövlətçiliyi məsələsində Türkiyənin dəyişməz dəstəyini bir daha ifadə edib.
Bundan əlavə, prezident R.T.Ərdoğan İsrailin Qəzzadakı törətdiyi əməlləri “soyqırım” kimi qiymətləndirərək, buna göz yummağın işlənən bu günaha ortaq olmaq mənasına gəldiyini bildirib.
Prezident Rəcəb Tayyib Ərdoğan deyib: “Biz heç vaxt Fələstin məsələsi qarşısında susmadıq və heç vaxt da susmayacağıq”. Dövlət başçısı rəsmi Ankaranın bu istiqamətdə uzunmüddətli mövqeyini bir daha xatırladıb.
R.T.Ərdoğan qış fəslinin gəlməsi və soyuqların da artmasına diqqət çəkərək qeyd edib ki, Türkiyə Qəzzaya humanitar yardım çatdırmaq səylərini artırıb.
Rəsmi Ankaranın Qəzza üzrə əldə olunan atəşkəsi qorumaq və humanitar yardımı təmin etmək üçün çalışdığını vurğulayan R.T.Ərdoğan bildirib ki, bu iki addım bölgədə uzunmüddətli sabitlik perspektivi üçün həlledici əhəmiyyət daşıyır.
Prezident Rəcəb Tayyib Ərdoğan Türkiyənin iki dövlətli həllə sadiqliyini yenidən təsdiqləyərək bildirib ki, 1967-ci il sərhədləri əsasında, paytaxtı Şərqi Qüds olan azad, suveren və müstəqil Fələstin dövləti qurulana qədər bu siyasət qətiyyətlə davam etdiriləcək.
