İranın təcili yardım xidmətləri Tehranın hədəf alınması nəticəsində həlak olanlar arasında altı uşağın olduğunu bildirib. Yerli medianın məlumatına görə, ABŞ və İsrailin İrana qarşı həyata keçirdiyi birgə hava hücumları nəticəsində ölkə ərazisində azı 25 nəfər həyatını itirib.

"Mehr" xəbər agentliyi paytaxtın şərq hissəsinə endirilən zərbələr nəticəsində üç binanın tamamilə dağıldığını, 50-yə yaxın evə isə ciddi ziyan dəydiyini bildirib.

Baharistan qubernatoru qeyd edib ki, Qaleh Mir şəhərində iki yaşayış məntəqəsinin bombalanması ciddi insan tələfatına səbəb olub. Hücumlar zamanı paytaxtdakı Şərif Texnologiya Universitetinin də hədəf alındığı bildirilib.

İran buna cavab olaraq İsrailin Hayfa şəhərinə ağır zərbələr endirib. İsrail polisi hücumlardan sonra Karmel bölgəsinə bomba zərərsizləşdirmə mütəxəssislərinin cəlb olunduğunu açıqlayıb. Raket zərbələri nəticəsində bir neçə bina və nəqliyyat vasitəsinə ciddi ziyan dəyib. "Kanal 12"nin məlumatına görə, xilasetmə qrupları Hayfada vurulan binalardan birinin dağıntıları altından iki nəfərin cəsədini çıxarıblar.