Yəməndə Səudiyyə Ərəbistanının rəhbərlik etdiyi koalisiya Qırmızı dəniz sahilindəki Hudeydə bölgəsində husi qruplaşmasına qarşı məqsədli hərbi əməliyyat keçirərək dəniz silahı anbarlarını məhv edib və beynəlxalq dənizçilik marşrutlarına qarşı planlaşdırılan hücumların qarşısını alıb.
Koalisiya sözçüsü Turki əl-Maliki "X" platforması vasitəsilə verdiyi açıqlamada dəniz birliklərinin sahil xətti boyu husi hərbi hədəflərinə zərbələr endirdiyini təsdiqləyərək, koalisiya qüvvələrinin "silah anbarlarını, tələ qurulmuş qayıqların və dəniz minalarının saxlanıldığı obyektləri məhv etdiyini" bildirib.
Əl-Maliki əməliyyatın "Qırmızı dənizin cənubundakı su yollarını hədəf alan son dövrlərə aid hücum planlarının" qarşısını uğurla aldığını da sözlərinə əlavə edib.
Sözügedən hücumlar getdikcə şiddətlənən və çoxcəbhəli bir hərbi əməliyyatın tərkib hissəsi xarakterində idi.
Yəmən ordusu husilərin nəzarətindəki paytaxt Sananı geri almaq məqsədilə hücuma başladığını və 1 000-dən çox hava zərbəsi endirdiyini bəyan edərkən, koalisiya da 100 qırıcı təyyarənin ölkə miqyasında dan yeri aradanda çox sayda uçuş həyata keçirdiyini təsdiqləyib.
Beynəlxalq səviyyədə tanınan hökumət tərəfdarı qüvvələr, oktyabrın 4-də verdikləri açıqlamada Yəmən əhalisinin böyük hissəsinin yaşadığı və husilərin nəzarəti altında olan bütün bölgələri geri almaq hədəflərini elan ediblər.
Kritik nöqtə: Babül-Məndəb
Husi qüvvələri təcili açıqlama yayaraq Səudiyyə Ərəbistanı daxilindəki kritik infrastruktur obyektlərinə qarşı irimiqyaslı cavab hücumları təşkil etdiklərini iddia ediblər.
Qruplaşma Ər-Riyad Hava Limanı, Rabiqdəki "Aramco" neftayırma zavodu, Abha Hava Limanı, Xamis Müşayt hərbi hava bazası, Nəcran və Asirdəki "Akfa" hərbi düşərgəsini hədəf alan pilotsuz uçuş aparatları (PUA) və ballistik raketlər atdıqlarını bəyan edib.
Baş verən bu kəskin gərginləşmə ötən ay meydana gələn və balansları ciddi şəkildə dəyişdirən ərazi dəyişikliklərindən sonra baş verib.
İran tərəfdarı husi döyüşçüləri Qırmızı dəniz sahil xəttinin geniş bir hissəsini və beynəlxalq xam neft ilə ticari dəniz nəqliyyatı baxımından həyati əhəmiyyətli keçid nöqtəsi olan Babül-Məndəb boğazına nəzarət edən strateji mövqeləri ələ keçirərək Yəməndə illərdir görünən ən qanlı qarşıdurmaları alovlandırıblar.
