Livanın Səhiyyə Nazirliyi İsrail ilə Hizbullah arasında əldə olunmuş atəşkəsə baxmayaraq, ölkənin cənubunda baş verən İsrail hücumlarında 14 nəfərin öldüyünü açıqlayıb.

Nazirlik həlak olanlar arasında iki qadın və iki uşağın olduğunu təsdiqləyərkən, 37 nəfərin də yaralandığını bildirib.

Livan dövlət xəbər agentliyi həmçinin İsrail ordusunun cənubdakı Yarun və Bint Cubeyl qəsəbələri arasında evləri və infrastrukturu hədəf alan dağıntılar törətdiyini qeyd edib.

Xəbər agentliyi İsrail qüvvələrinin Sur bölgəsindəki Burj Kallaviye qəsəbəsinə hava hücumu təşkil etdiyini və eyni bölgədəki Mansuri və Beyt əl-Seyyid qəsəbələrini atəşə tutduğunu bildirdi.

Nəbatiyə bölgəsində isə İsrailin Kfar Tebnit qəsəbəsinə təşkil etdiyi hücumda artilleriya atəşi Arnun qəsəbəsini və Əli əl-Tahir meşəlik ərazisini vurub.

İsrail döyüş təyyarələri eyni bölgədəki Zavtar əl-Şarkiyeyə də basqınlar təşkil edərək bir məscid və dini fəaliyyətlər üçün istifadə olunan salonu mərkəzi dağıdıb.

Agentliyin məlumatına görə, İsrail qüvvələri Bint Cubeyl bölgəsində Beyt Yahun qəsəbəsini hədəf alarkən, Burj Kallaviyeyə üç, Kafraya bir və Cubal Əl Botım ilə Sadıkin arasındakı bölgəyə də basqın təşkil edib.

İsrail atəşkəs pozuntularını davam etdirir

Hizbullah İsrail mövqelərinə qarşı hücumlarının sazişin "davamlı" pozulmasına cavab olduğunu bildirib.

17 apreldə qüvvəyə minən 10 günlük atəşkəs üç həftə daha uzadılmış olsa da, Hizbullah "İsrailin atəşkəsi pozmağa, hücumlar təşkil etməyə, evləri dağıtmağa və Livan torpaqlarını işğal etməyə davam etməsinə cavab veriləcəyini açıq və qəti şəkildə təsdiqləyirik", deyə bildirib.

Təşkilat İsrailin 17 apreldən bu yana atəşkəsi 500 dəfə pozduğunu açıqlayıb.

Hizbullah İsrailin şimalındakı yaşayış məntəqələrinə yönəlmiş bombardmanlarını bu pozuntulara "legitim bir cavab" kimi qiymətləndirib.

Hizbullah bildirib ki, atəşkəsin həftəbəhəftə uzadılması real bir atəşkəsə aparıb çıxarmalı idi. Bunun əvəzinə İsrail təcavüzünü artırdı.

İsrail ordusu Livanın cənubunda davam edən qarşıdurmalarda bir əsgərin öldüyünü və altı əsgərin yaralandığını açıqlayıb.

Qeyd edək ki, İsrail martın 2-də sərhədyanı hücumdan sonra hava zərbələri ilə hədəf aldığı Livana quru əməliyyatı da başlatmışdı.

Livanlı rəsmilərin bildirdiyinə görə, o vaxtdan bəri İsrailin hücumları 2500-dən çox insanın ölümünə və 1 milyondan çox insanın didərgin düşməsinə səbəb olub.