Belçika İsrailin Suriyada həyata keçirdiyi hücumlar və əməliyyatlarla bağlı narahatlığını ifadə edərək Suriyanın suverenliyinə və ərazi bütövlüyünə hörmət edilməsinin vacibliyini vurğulayıb.

Belçika Xarici İşlər Nazirliyinin rəsmi internet səhifəsində edilən paylaşımda bildirilib ki, Beyt Cin şəhərində mülki itkilər barədə məlumatlar da daxil olmaqla davam edən hücumlar gərginliyi artırır və regional təhlükəsizliyə təhdid yaradır. Bəyanatda deyilir: “Suriyanın suverenliyinə və ərazi bütövlüyünə hörmət edilməlidir’’.

2024-cü ilin sonlarında Bəşər Əsəd rejiminin devrilməsindən sonra İsrail Suriya ilə 1974-cü ildə imzalanmış müqaviləni pozaraq silahsızlaşdırılmış bufer zonasını ələ keçirib və Suriyanın Qolan təpələrindəki işğalını genişləndirib.