Honkonqda yaşayış kompleksində baş verən yanğın zamanı ölənlərin sayı artmaqda davam edir

Honkonqda yaşayış binasında baş verən yanğında ölənlərin sayı 44-ə, itkin düşənlərin sayı isə 279-a çatıb.

Xəstəxanaya yerləşdirilən 45 nəfərin vəziyyəti ağır olaraq qalır.

Honkonqun Tay Po rayonundakı səkkiz binalı kompleksdə baş verən yanğında ölənlərin sayı 44-ə çatıb, 279 nəfər isə hələ də itkindir.

"South China Morning Post" saytının məlumatına görə, ölənlərin sayı artmaqda davam edir.

Yanğın noyabrın 27-də günorta saatlarında 1900-dən çox mənzilin yerləşdiyi kompleksin içərisində başlayıb və təmir üçün xarici hissəyə quraşdırılmış bambuk iskələlər səbəbindən sürətlə yayılıb.

Yerli yanğınsöndürmə idarəsinin məlumatına görə, indiyə qədər biri yanğınsöndürən olmaqla 44 nəfər ölüb.

Yaralananlardan 45-nin vəziyyətinin ağır olduğu bildirilir.

Təxminən 4000 nəfərin yaşadığı təxmin edilən kompleksdə alovlanan yeddi binadan üçündə yanğın nəzarət altına alınıb. Digər dörd binada isə yanğınlar hələ də davam edir.

Ümumilikdə 279 nəfərin hələ də itkin düşdüyü bildirilir və 26 yanğınsöndürən yanğını söndürmək üçün səylərini davam etdirir.

Polis təmir işlərinə cavabdeh olan tikinti şirkətinin iki menecerini və bir məsləhətçi mühəndisini adam öldürmə şübhəsi ilə saxlayıb.

Səlahiyyətlilər təmir üçün quraşdırılmış bambuk iskele və pəncərələri örtən köpük plastik materialların yanğının sürətlə yayılmasında mühüm rol oynadığını bildiriblər.

"Şirkətdəki məsul şəxslərin kobud səhlənkarlığından şübhələnirik ki, bu da yanğının sürətlə yayılmasına və çoxsaylı itkilərə səbəb olub", - deyə baş müfəttiş Eileen Chung Lai-yee bildirib.

Yanğının qeyri-adi dərəcədə sürətli yayılması

Honkonq Təhlükəsizlik katibi Kris Tanq ilkin araşdırmaların yanğının yayılma sürətinin qeyri-adi olduğunu və əsasən köpük izolyasiyası ilə əlaqəli olduğunu göstərdiyini bildirib.

"Bina divarlarını, iskele ətrafındakı torları və suya davamlı brezentləri örtən materialın alovların təhlükəsizlik standartlarına cavab verən materiallardan daha sürətli yayılmasına səbəb olduğunu aşkar etdik", -deyə Tanq deyib.

Qeyd edək ki, Honkonq 17 ildən sonra ilk dəfə olaraq şəhərin beş səviyyəli yanğın şkalası üzrə ən yüksək səviyyə olan 5-ci səviyyəli yanğın həyəcanı elan etdi.

Səlahiyyətlilər bildiriblər ki, iki qonşu yaşayış kompleksi də təxliyə edilib və yanğından zərər çəkən təxminən 900 sakin səkkiz müvəqqəti müəssisədə yerləşdirilib.

Hadisə yerinə 140-dan çox yanğınsöndürmə maşını və 800-dən çox təcili yardım və yanğınsöndürmə işçisi göndərilib.

Nəqliyyat Departamenti yanğın səbəbindən ətraf yolların bağlandığını açıqlayıb.

Çin prezidenti Si Cinpin insan itkisi ilə bağlı Honkonq hökumətinə başsağlığı verib və Pekindəki Honkonq və Makao İşləri Ofisinə yerli hakimiyyət orqanlarına cavab tədbirlərində dəstək olmağı tapşırıb.

Honkonqun baş icraçı direktoru Con Li Ka-çiu ölüm və yaralanmaların çoxluğundan dərin kədərini bildirib, qurbanların ailələrinə başsağlığı verib və yaralılara tezliklə sağalmalarını arzulayıb. O, həmçinin fəlakətə müdaxilə tədbirlərində koordinasiya üçün təcili kabinet iclası keçirib.