Qəzza Mülki Müdafiə Xidməti bildirib ki, Xan Yunisdə yerləşən əl-Mevasi bölgəsindəki müxtəlif məntəqələrdə qaçqın düşərgələrində çox sayda çadır yağış suları ilə dolub. Xilasetmə qrupları əraziyə müdaxilə edərək əhaliyə kömək göstərdiyi bildirilir.
Noyabrın 15-dən etibarən havanın kəskin şəkildə dəyişməsi müharibə səbəbi ilə 1,5 milyon yerindən edilmiş insanların sıx şəraitdə yaşadığı Qəzzada vəziyyəti daha da ağırlaşdırıb.
Qəzza hökumətinin media ofisinin məlumatına görə, hava şəraiti və İsrail bombardmanının vurduğu ziyan səbəbindən ümumilikdə 135.000 çadırdan 125.000-i (93%) artıq yaşayış üçün yararsız vəziyyətə düşüb.
BMT-dən təcili sığınacaq çağırışı
BMT-nin Fələstinli Qaçqınlara Yardım Agentliyi (UNRWA) güclü yağışların yerindən edilmiş insanların çadırlarını basmasından sonra Qəzzaya təcili olaraq çadır, prefabrik ev və digər yaşayış materiallarının daxil olmasına icazə verilməsi üçün çağırış edib.
Fələstinli Qaçqınlara Yardım Agentliyi “X” platformasında yayımladığı açıqlamada “Qəzzaya qış gəlib” sözləri ilə bölgədə ağırlaşan hava şəraitinə diqqət çəkib.
Açıqlamada deyilir: “Qəzzadakı yağan yağışlar insanların vəziyyətini daha da dözülməz hala salıb. Ailələr tapdıqları hər yerə sığınmağa çalışırlar.”
Agentlik bildirib ki, Qəzzanın qışı keçirə bilməsi üçün lazım olan bütün təcili yaşayış materialları mövcuddur, lakin onların bölgəyə buraxılması tələb olunur.
İsrail isə 10 oktyabrda qüvvəyə minmiş atəşkəs razılaşması çərçivəsində üzərinə düşən öhdəlikləri yerinə yetirməyərək, çadır, prefabrik ev və digər yaşayış üçün zəruri materialların Qəzzaya girişini hələ də əngəlləyir.
Xəbər verildiyi kimi, ABŞ prezidenti Donald Trampın 20 maddəlik planına əsaslanan atəşkəs razılaşmasının birinci mərhələsi, fələstinli məhbusların azad olunması müqabilində israilli əsirlərin azad edilməsini nəzərdə tutur. Plan həmçinin Qəzzanın yenidən qurulmasını və “Həmas”ın iştirak etmədiyi yeni idarəetmə mexanizminin yaradılmasını əhatə edir.
Xatırladaq ki, İsrail 2023-cü ilin oktyabrından bəri Qəzzada çoxu qadın və uşaq olmaqla 69.000-dən çox insanı öldürüb və bölgəni tamamilə viran qoyub.
