Rusiya Nəqliyyat Nazirliyi Ukraynaya məxsus pilotsuz dəniz vasitəsinin Aralıq dənizində alovlanan "Arctic Metagaz" adlı mayeləşdirilmiş təbii qaz (LNG) tankerinə hücum etdiyini iddia edib.

Əgər bu məlumat rəsmən təsdiqlənərsə, hadisə Ukraynanın Rusiya LNG tankerinə qarşı həyata keçirdiyi ilk hücum kimi qeydə alınacaq.

Ukrayna Təhlükəsizlik Xidməti məsələ ilə bağlı sorğulara hələ cavab verməyib. Lakin rəsmi Kiyev daha əvvəl Rusiyadakı bir sıra neft emalı zavodlarına və enerji obyektlərinə dəfələrlə zərbələr endirib.

Rusiya tərəfinin yaydığı bəyanatda gəmidəki 30 ekipaj üzvünün hamısının Rusiya vətəndaşı olduğu və onların təhlükəsizlikdə olduğu bildirilib.

Nazirlik baş verənləri "beynəlxalq terrorizm" və beynəlxalq dəniz hüququnun fundamental normalarının ciddi şəkildə pozulması kimi xarakterizə edib.

Məlumata görə, Murmanskdan yük daşıyan və Maltaya məxsus olan gəmi beynəlxalq sulara yaxın ərazidə hücuma məruz qalıb.

Nazirlik həmçinin xilasetmə işlərinə görə Maltaya təşəkkürünü bildirib.

Məlumatda Ukrayna pilotsuz dəniz vasitələrinin hücumu Liviya sahillərindən həyata keçirdiyi vurğulanıb. Hadisə ilə bağlı gəminin Rusiyada yerləşən operatoru "MMC SMP Techmanagement" və ölkənin ən böyük LNG istehsalçılarından biri olan "Novatek" hələlik heç bir şərh verməyib.