ABŞ Müdafiə Təhlükəsizliyi Əməkdaşlıq Agentliyi (DSCA) ABŞ Dövlət Departamentinin Hindistana 93 milyon dollar dəyərində “Javelin” tank əleyhinə raket sistemləri və “Excalibur” idarə olunan artilleriya sursatlarının satışını təsdiqlədiyini açıqlayıb.
Bu Hindistanın ABŞ-ın xaricilərə hərbi texnika satmaq proqramı çərçivəsində etdiyi ilk alışdır. İki ölkə arasında münasibətlər avqust ayında pisləşib. Gərginlik ABŞ Prezidenti Donald Trampın Yeni Dehlinin Rusiya nefti almasına cavab olaraq Hindistan məhsullarına tarifləri 50 faiz artırmaq qərarından sonra artıb.
ABŞ Müdafiə Təhlükəsizliyi Əməkdaşlıq Agentliyi (DSCA) bildirib ki, bu qərar ABŞ-Hindistan strateji münasibətlərinin möhkəmləndirilməsinə və Hindistan kimi əsas müdafiə tərəfdaşının təhlükəsizliyinin artırılmasına kömək edəcək. Hindistan isə Hind-Sakit Okean və Cənubi Asiya bölgələrində siyasi sabitlik, sülh və iqtisadi tərəqqi üçün əhəmiyyətli bir qüvvə olaraq qalır.
Agentliyin məlumatına görə, Hindistan hökuməti 216 ədəd “Excalibur” taktiki sursat və 100 ədəd “Javelin” sistemini almaq niyyətindədir. Hindistan “M-777” haubitsalarında “Excalibur” artilleriya sursatından istifadə edir.
