Türkiyə Sudanda didərgin salınmış mülki şəxslərə qarşı ölümcül hücumu pisləyib

Rəsmi Ankara silahlı münaqişələr zamanı heç bir halda mülki şəxslərin və mülki infrastrukturun hədəfə alınmamasının vacibliyini vurğulayıb.

Türkiyə Sudanın Şimali Kordofan əyalətində didərgin salınmış mülki şəxslərə qarşı ölümcül hücumu pisləyərək, hərbiləşdirilmiş Çevik Dəstək Qüvvələrinin (RSF) mülki şəxsləri daşıyan nəqliyyat vasitəsini hədəfə alması nəticəsində çox sayda insanın həlak olmasından dərin kədər hissi keçirdiyini bildirib.

Türkiyə Xarici İşlər Nazirliyinin açıqlamasında deyilib:

“Sudanın Şimali Kordofan əyalətində məcburi köçkünləri daşıyan nəqliyyat vasitəsinə Çevik Dəstək Qüvvələrinin (RSF) hücumu nəticəsində çox sayda mülki şəxslərin həyatını itirdiyini dərin kədərlə öyrəndik. Hadisənin davam edən münaqişə səbəbindən evlərindən qaçmağa məcbur olan mülki şəxsləri daşıyan bir nəqliyyat vasitəsi ilə əlaqəli olduğu açıqlanıb. Bu hücum münaqişələrdə mülki şəxslərin və mülki infrastrukturun qorunması ilə bağlı beynəlxalq humanitar hüququn açıq və ciddi şəkildə pozulmasıdır”.

Rəsmi Ankara silahlı münaqişələr zamanı mülki şəxslərin və mülki infrastrukturun heç bir halda hədəfə alınmamasının vacibliyini vurğulayaraq, mülki şəxslərə qarşı hücumları sərt dillə pisləyib.

Ümumdünya Ərzaq Proqramının (ÜƏP) karvanının hədəfə alınması

Türkiyə həmçinin münaqişədən təsirlənənlərin təhlükəsizliyini təmin etmək üçün tədbirlər görülməsi çağırışını təkrarlayıb və mülki şəxslər üçün təhlükəsiz və fasiləsiz keçidin təmin edilməsi və humanitar yardımın maneəsiz çatdırılması çağırışını bir daha dilə gətirib.

Qeyd edək ki, Sudan hökuməti Şimali Kordofanda ÜƏP-nin yardım karvanına qarşı dron hücumunda Çevik Dəstək Qüvvələrini (RSF) günahlandırıb.

Həmçinin fevralın 7-də Sudan hakimiyyəti RSF-in Şimali Kordofanın Əl-Rahad şəhərində məcburi köçkünləri daşıyan bir avtomobili hədəfə alması nəticəsində qadınlar, uşaqlar və yaşlılar da daxil olmaqla 24 mülki şəxsin öldüyünü və bir çoxunun yaralandığını açıqlayıb.

25 yanvarda Sudan ordusu Mavi Nil əyalətinin Əl-Silik və Malkan bölgələrində RSF qüvvələri və müttəfiq silahlılar tərəfindən həyata keçirildiyi iddia edilən oxşar hücumu dəf etdiyini açıqlayıb.

Sudanın 18 ştatından RSF qərbi Darfur bölgəsindəki beş ştatın hamısına nəzarət edir, Şimali Darfurun bəzi hissələri isə ordunun nəzarəti altında qalır. Ordu isə öz növbəsində paytaxt Xartum da daxil olmaqla, ölkənin cənubunda, şimalında, şərqində və mərkəzində qalan 13 ştatın əksəriyyətinə nəzarət edir.

Sudan ordusu ilə RSF arasında 2023-cü ilin aprelində başlayan münaqişə minlərlə insanın ölümünə, milyonlarla insanın didərgin düşməsinə və dünyanın ən pis humanitar böhranlarından birinə səbəb olub.