Noyabrın 17-də Səudiyyə Ərəbistanında Hindistandan olan zəvvarları daşıyan bir avtobus qəzaya uğrayıb. Hadisə müqəddəs şəhərlərdən biri olan Mədinə yaxınlığında baş verib. Ağır yol qəzasında təxminən 45 nəfərin həyatını itirdiyi bildirilir. Bu hadisənin son illərdə Səudiyyə Ərəbistanında baş verən ən ağır qəzalar arasında olduğu qeyd olunub.
Herydərabad şəhər polis komissarı V.C.Sajjanar jurnalistlərə açıqlamasında deyib:
“Səudiyyə Ərəbistanında çoxu Heydərabad şəhərindən olan ziyarətçilərin olduğu avtobusun keçirdiyi bu faciəvi qəza son dərəcə üzücüdür.”
V.C.Sajjanar əlavə edib ki, ilkin məlumatlara görə, hadisə zamanı avtobusda 46 nəfər olub və onlardan təkcə bir nəfər xilas ola bilib.
Səudiyyəli rəsmilər qəzanın nəticələri ilə bağlı hələlik rəsmi açıqlama verməyiblər.
Yeni Dehlinin başsağlığı
Hindistanın Baş naziri Narendra Modi noyabrın 17-də sosial şəbəkə vasitəsilə başsağlığı verib və Hindistan səfirliyinin Səudiyyə Ərəbistanı rəsmiləri ilə birgə işlədiyini bildirib.
N.Modi “X” sosial platformasında yazıb: “Mədinədə Hindistan vətəndaşlarının iştirakı ilə baş verən qəzadan dərin kədər hissi duyuram. Həlak olanların yaxınlarını baş sağlığı diləyirəm. Yaralananların tezliklə sağalması üçün dua edirəm. Ər-Riyadda səfirliyimiz və Ciddədəki konsulluğumuz bütün lazımi yardımı göstərir.”
Yol qəzaları Səudiyyə Ərəbistanında ölüm hallarının əsas səbəblərindəndir
Birləşmiş Millətlər Təşkilatının 2023-cü ildə yayımladığı bəyanatda qeyd olunub ki, yol-nəqliyyat qəzaları Səudiyyə Ərəbistanında xəsarət və ölüm hallarının ən əsas səbəblərindən biri olaraq qalır. Səudiyyə Ərəbistanı Krallığı yüksək gəlirli digər ölkələrlə müqayisədə yol qəzalarında hələ də yüksək ölüm göstəricisinə sahibdir.
Belə bir vəziyyət, zəvvarları Səudiyyə Ərəbistanının müqəddəs məkanlarına daşımaq üçün təhlükəli ola bilir; xüsusilə həcc mövsümündə yollarda xaotik vəziyyət yaranır və avtobuslar uzun tıxaclarda ilişib qalır.
Həcc mövsümü xaricində də milyonlarla insan ümrə ziyarəti üçün Səudiyyə Ərəbistanını ziyarət edir.
Əvvəlki hadisələr
2023-cü ilin mart ayında Məkkəyə gedən bir avtobus körpüdə baş verən toqquşmadan sonra alovlanmış, qəza nəticəsində 20 nəfər həlak olmuş, 24-dən çox insan isə yaralanmışdı.
2019-cu ilin oktyabrında isə Mədinə yaxınlığında bir avtobus başqa bir ağır nəqliyyat vasitəsi ilə toqquşmuş, nəticədə təxminən 35 xarici vətəndaş həyatını itirmiş, dörd nəfər yaralanmışdı.
Qeyd edək ki, Həcc və ümrə ziyarətləri Səudiyyə Ərəbistanının böyüməkdə olan turizm sektorunun mühüm hissəsini təşkil edir.
Səudiyyə Ərəbistanı həmçinin iki milyondan artıq Hindistan vətəndaşına ev sahibliyi edir. Bu insanlar uzun illərdir ölkənin əmək bazarında mühüm rol oynayır, çoxsaylı mega layihələrin inşasında iştirak edir və hər il Hindistana milyardlarla dollar həcmində valyuta göndərirlər.
