Suriyanın paytaxtı Dəməşqdə hücum törətməyə hazırlaşan DEAŞ terrorçularına ağır zərbə endirilib, nəticədə 3 təşkilat üzvü saxlanılıb.

Türkiyə Milli Kəşfiyyat Təşkilatının (MİT) həyata keçirdiyi əməliyyat nəticəsində terror təşkilatına məxsus terror hücrəsi aşkar edilib. MİT əldə etdiyi məlumatları Suriya Daxili Təhlükəsizlik Xidməti Komandanlığı və Suriya Baş Kəşfiyyat İdarəsi ilə paylaşıb.

Məlumatlar əsasında hərəkətə keçən Suriya kəşfiyyatı terrorçuları və onların fəaliyyətlərini izləyərək dəqiq koordinatlarını müəyyən edib. Keçirilən uğurlu əməliyyat nəticəsində DEAŞ üzvləri Ömər Haşim, Məhəmməd Həmid və Hüseyn Xələf saxlanılıb. Əməliyyatla eyni vaxtda bomba mütəxəssisləri strateji bir nöqtəyə yerləşdirilmiş və uzaqdan partladılmaq üçün hazırlanmış avtomobilə müdaxilə ediblər. Nəqliyyat vasitəsində böyük dağıntılara səbəb ola biləcək yüksək miqdarda C4 və TNT aşkar edilib.

Saxlanılan 3 şəxs Suriya Baş Kəşfiyyat İdarəsinin Terrorla Mübarizə İdarəsinə təhvil verilib. Qeyd edək ki, ötən həftə DEAŞ tərəfindən yayımlanan səs qeydində təşkilat üzvlərinə hücumlar üçün hazır olmaları barədə göstəriş verilmişdi. Dəməşqdə həyata keçirilən bu əməliyyatla planlaşdırılan qanlı aksiyanın qarşısı vaxtında alınıb.