ABŞ və İsrailin İrana qarşı hücumları, həmçinin İranın Körfəz ölkələrini və Hörmüz boğazını hədəf alan cavab tədbirləri fonunda Türkiyə və Qətərin müdafiə nazirləri arasında telefon danışığı baş tutub. Görüş zamanı tərəflər ikitərəfli əlaqələr və regional təhlükəsizlik məsələlərini ətraflı müzakirə ediblər.
Türkiyənin Milli Müdafiə Naziri Yaşar Gülər ilə Qətər Dövlətinin Baş nazirinin müavini və müdafiə naziri Şeyx Saud bin Əbdürrəhman bin Həsən bin Əli Əl Tani arasında telefon danışığı baş tutub.
Türkiyə Milli Müdafiə Nazirliyinin bu gün yaydığı bəyanatda bildirilib ki, görüş zamanı ikitərəfli və regional müdafiə, həmçinin təhlükəsizlik məsələləri ətrafında fikir mübadiləsi aparılıb.
Sözügedən telefon danışığı ABŞ və İsrailin İrana qarşı həyata keçirdiyi birgə hücumlar nəticəsində regional gərginliyin pik həddə çatdığı bir dövrə təsadüf edib.
Qeyd edək ki, İsrail və ABŞ-nin 28 fevralda İrana qarşı başlatdığı genişmiqyaslı hücumlarda indiyədək aralarında ali lider Əli Xameneinin də olduğu təxminən 1 300 nəfərin həyatını itirdiyi bildirilir.
Regional gərginliyin artması fonunda İran bu hücumlara cavab olaraq İsrail, İordaniya, İraq və ABŞ hərbi qüvvələrinin yerləşdiyi müxtəlif Körfəz ölkələrini hədəf alan pilotsuz uçuş aparatları (PUA) və raket zərbələri ilə qisas əməliyyatları həyata keçirib.
İran martın əvvəllində qlobal neft daşınmasının gündəlik təxminən 20 milyon barelinin və dünya mayeləşdirilmiş təbii qaz (LNG) ticarətinin 20 faizinin keçdiyi strateji əhəmiyyətli Hörmüz boğazını faktiki olaraq bağlayıb.
