Avstraliyanın Baş naziri Entoni Albanese Sidneydəki çimərlikdə keçirilən yəhudi festivalı zamanı 15 nəfərin ölümü ilə nəticələnən silahlı hücumdan sonra silah qanunlarının sərtləşdirilməsini təklif edib.
Baş nazir bildirib ki, bir şəxsin sahib ola biləcəyi silahların sayına məhdudiyyət qoyulması da daxil olmaqla, daha sərt silah qanunlarına ehtiyac var. Onun sözlərinə görə, hökumət bu istiqamətdə bütün zəruri addımları atmağa hazırdır.
Albanese islahat təkliflərini dekabrın 15-də keçiriləcək Milli Nazirlər Kabinetinin iclasında təqdim edəcəyini açıqlayıb. O, vurğulayıb ki, insanların zamanla radikallaşması mümkündür və silah lisenziyaları müddətsiz olmamalıdır.
Baş nazir həmçinin ölkədə silah qanunlarının yenidən sərtləşdirilməsinin vacibliyini vurğulayaraq bu prosesə tam hazır olduqlarını deyib.
Yeni Cənubi Uels (NSW) ştatının komissarı Mal Lanyon bildirib ki, hazırkı mərhələdə şübhəlilərdən birinin sahib olduğu odlu silahlar onun mövcud lisenziyaları çərçivəsində qanunidir.
Svinburne Texnologiya Universitetinin kriminologiya üzrə müəllimi Maya Gomez isə qeyd edib ki, Yeni Cənubi Uels ştatında silah lisenziyası almaq istəyən şəxslər əvvəlcə odlu silaha ehtiyaclarının əsaslı səbəbini sübut etməlidirlər.
Bondidəki atışmadan sonra Gomez bildirib ki, müzakirələr əsasən silahların sayına, həmçinin hücumda istifadə olunan və qeydiyyata alınmış silah növləri üçün verilmiş əsaslandırmalara yönələ bilər.
Avstraliyada silahların sayı artsa da, silahla əlaqəli cinayətlərin səviyyəsi qlobal miqyasda aşağı olaraq qalır. Avstraliya Kriminologiya İnstitutunun məlumatına görə, 2024-cü ilin iyun ayına qədər ölkədə silahlı hücum nəticəsində 33 nəfər həyatını itirib.
