Donald Tramp Səudiyyə Ərəbistanını NATO-ya üzv olmayan əsas müttəfiq elan etdi
Tramp deyib: “Səudiyyə Ərəbistanını NATO-ya üzv olmayan əsas müttəfiq kimi tanımaqla hərbi əməkdaşlığımızı daha da gücləndiririk. Bu onlar üçün çox vacib bir məsələdir’’
ABŞ Prezidenti Donald Tramp Səudiyyə Ərəbistanını rəsmi olaraq NATO-ya üzv olmayan əsas müttəfiq olaraq elan edib.
Tramp deyib: “Səudiyyə Ərəbistanını NATO-ya üzv olmayan əsas müttəfiq kimi tanımaqla hərbi əməkdaşlığımızı daha da gücləndiririk. Bu onlar üçün çox vacib bir məsələdir’’.
Bu açıqlama iki ölkə arasında strateji müdafiə müqaviləsinin imzalanmasından sonra verilib. Səudiyyə mediası bu addımı uzunmüddətli müdafiə əməkdaşlığını gücləndirən və regionda sülh, təhlükəsizlik və rifahın təşviqinə dair ortaq öhdəliyi əks etdirən mühüm bir addım kimi qiymətləndirib.
Ağ Evin açıqlamasına görə, vəliəhd şahzadənin Vaşinqtona səfəri zamanı ABŞ və Səudiyyə Ərəbistanı mülki nüvə enerjisi və müdafiə sahəsində bir sıra müqavilələr də imzalayıblar.
ABŞ administrasiyası iki tərəfin mülki nüvə enerjisi üzrə “birgə bəyannamə”ni təsdiqlədiyini, bu sənədin qarşıdakı onilliklərdə milyardlarla dollarlıq əməkdaşlıq üçün hüquqi əsas yaratdığını bildirib. Ağ Ev vurğulayıb ki, proses nüvə silahlarının yayılmaması qaydalarına uyğun aparılacaq.
Prezident Donald Tramp həmçinin F-35 qırıcı təyyarələrini də əhatə edən silah müqaviləsini təsdiqləyib.