Kiyev vilayəti Hərbi Administrasiyasının rəhbəri vəzifəsini icra edən Mikola Kalaşnik Ukraynanın paytaxtından uzaqda yerləşən bir yaşayış məhəlləsinə Rusiyaya məxsus pilotsuz uçuş aparatı (PUA) hücumu nəticəsində bir nəfərin həyatını itirdiyini, 11 nəfərin yaralandığını açıqlayıb.
M.Kalaşnik bəyanatında bunun daha bir düşmən PUA hücumu olduğunu bildirərək, xilasetmə qrupları tərəfindən çoxmərtəbəli yaşayış binası sakinlərinin təxliyə olunduğunu və yanğınsöndürmə işlərinin davam etdiyini deyib.
O, “Telegram” sosial şəbəkəsində yazıb: “Təəssüf ki, Vişqoroda həyata keçirilən düşmən hücumu nəticəsində bir nəfər həyatını itirib, 11 insan yaralanıb. Yaralananlardan biri uşaqdır.”
Sülh danışıqları
Ukrayna prezidenti Volodimir Zelenski bildirib ki, Ukrayna danışıqlar heyəti noyabrın 29-da müharibənin dayandırılması ilə bağlı ABŞ planı üzrə danışıqlar üçün Amerika Birləşmiş Ştatlarına gedib.
Xatırladaq ki, rəsmi Vaşinqtonun ilkin təklifi Ukraynanın şərqindəki Donbas bölgəsindən geri çəkilməsini və ABŞ-ın Donetsk, Krım və Luqansk bölgələrini faktiki olaraq Rusiya əraziləri kimi tanımasını nəzərdə tuturdu.
Kiyev rəhbərliyi və Avropadan gələn tənqidlərdən sonra ABŞ sülh layihə planınında dəyişikliklərə gedib, lakin layihənin hazırkı məzmunu hələ də qeyri-müəyyəndir.
Adı açıqlanmayan bir Fransa rəsmisinə görə, V.Zelenski dekabrın 1-də Fransa prezidenti Emmanuel Makronla görüşmək üçün Parisə səfər edəcək.
Qeyd edək ki, Kremlin tərəfi son bir neçə açıqlamasında bildirilib ki, Rusiya hələ də danışıqlara açıqdır və münaqişənin diplomatik yollarla həllini dəstəkləyir.
