İran mediası ölkənin ali dini lideri Ayətullah Əli Xameneinin İsrail və ABŞ-nin birgə həyata keçirdiyi hava hücumları nəticəsində öldüyünü açıqlayıb. Verilən rəsmi məlumatlara görə, 1989-cu ildən bəri hakimiyyətdə olan 86 yaşlı Xameneinin ölümü ilə əlaqədar ölkədə 40 günlük matəm və yeddi günlük tətil elan edilib. Dövlət televiziyasının efirində çıxış edən aparıcı ali rəhbərin yolunun və missiyasının qətiyyətlə davam etdiriləcəyini vurğulayıb.

Hadisədən sonra İslam İnqilabı Keşikçiləri Korpusu bəyanat yayaraq Xameneinin qatillərinin ən ağır şəkildə cəzalandırılacağını və İran xalqının cavabının şiddətli və qətiyyətli olacağını bildirib. "Fars" xəbər agentliyi və digər yerli media orqanları hücum zamanı ali liderlə yanaşı, onun qızı, kürəkəni və nəvəsinin də həlak olduğunu təsdiqləyib.

ABŞ Prezidenti Donald Tramp bu hadisəni təkcə İran xalqı üçün deyil, Xamenei rejiminin qurbanı olan amerikalılar və digər xalqlar üçün də ədalətin bərpası kimi qiymətləndirib.

İsrailin Baş naziri Benyamin Netanyahu isə yaydığı videomüraciətdə həyata keçirdikləri güclü və gözlənilməz hücumla Xameneinin olduğu məkanı məhv etdiklərini bəyan edib.

ABŞ kəşfiyyatındakı mənbələrin və yüksək vəzifəli rəsmilərin verdiyi məlumata görə,İsrail və ABŞ-ın fevralın 28-də həyata keçirdiyi hücum Ayətullah Əli Xameneinin köməkçiləri ilə keçirdiyi vacib görüş vaxtına uyğun şəkildə planlaşdırılıb. İsrail tərəfi iddia edir ki, əməliyyat nəticəsində Xamenei ilə yanaşı, Milli Təhlükəsizlik Şurasının keçmiş katibi Əli Şamxani və İslam İnqilabı Keşikçiləri Korpusunun komandanı Məhəmməd Pakpur da öldürülüb. "Reuters" agentliyinə məlumat verən iranlı mənbələr isə Xameneinin hücumdan qısa müddət əvvəl Şamxani və Əli Laricani ilə təhlükəsiz bir məkanda görüşdüyünü təsdiqləyib.

Yüksək vəzifəli İsrail rəsmisi isə Xameneinin meyitinin tapıldığını iddia edib.

ABŞ Prezidenti Donald Tramp "Truth Social" platformasında hadisə ilə bağlı açıqlama yayıb. D. Tramp bildirib ki, İran liderinin hərəkətləri izlənilib və onun ABŞ-ın müşahidə sistemlərindən gizlənməsi mümkün olmayıb. O, hədəfin İsraillə sıx əməkdaşlıq nəticəsində dəqiq vurulduğunu deyib. ABŞ rəsmilərinin sözlərinə görə, hücumun qəfildən həyata keçirilməsində əsas məqsəd İran liderinin gizlənməsinə imkan verməmək olub. Bu səbəbdən şənbə axşamı planlaşdırılan görüşlə bağlı əməliyyat kəşfiyyat məlumatları əsasında irəli çəkilib.

Görüşün dəqiq yeri hələ də məxfi qalsa da, əməliyyatın birinci mərhələsində Xameneinin Tehrandakı yüksək mühafizə olunan binasına sarsıdıcı zərbə endirilib. "Reuters" tərəfindən nəzərdən keçirilən peyk görüntüləri sözügedən binanın tamamilə dağıdıldığını faktiki olaraq təsdiqləyir.