Tuluza Vulkan Külü üzrə Məsləhət Mərkəzi bildirib ki, Efiopiyanın şimal-şərqində yerləşən Hayli Qubbi vulkanı təxminən 12.000 ildən sonra ilk dəfə püskürüb.
Əddis-Əbəbədən təxminən 800 kilometr şimal-şərqdə yerləşən vulkan bazar günü bir neçə saat ərzində fəal olub. Təxminən 500 metr hündürlüyündə olan Hayli Qubbi iki tektonik lövhənin birləşdiyi və intensiv geoloji fəaliyyətin müşahidə olunduğu Rift vadisində yerləşir.
Tuluza Vulkan Külü üzrə Məsləhət Mərkəzi vurğulayıb ki, vulkandan yüksələn kül buludları Yəmənin şimalına, Omana, Hindistana və Pakistana doğru hərəkət edir.
Smitson İnstitutunun Qlobal Vulkanizm Proqramı isə Hayli Qubbinin Holosen dövründə heç bir məlum püskürməsinin olmadığını açıqlayıb. Holosen dövrü təxminən 12.000 il əvvəl, Buz dövrünün bitdiyi zaman başlayıb.
Miçiqan Texnologiya Universitetinin vulkanşünası və professoru Saymon Karn da Hayli Qubbinin Holosen dövründən bəri heç bir qeydə alınmış püskürməsi olmadığını təsdiqləyib.
