Antarktida buzlarının əriməsi dəniz səviyyəsinin daha sürətli yüksəlməsinə səbəb ola bilər
Bu barədə ‘‘Nature’’ elmi jurnalında dərc edilən araşdırmada qeyd olunub
Noyabrın 20-də yayımlanan araşdırmaya görə, qlobal dəniz səviyyəsi əsrin sonuna qədər əvvəlki proqnozlardan təxminən iki dəfə çox arta bilər.
Bu barədə ‘‘Nature’’ elmi jurnalında dərc edilən araşdırmada qeyd olunub.
Araşdırmaya görə, təkcə Antarktida buzlaqlarının əriməsi 2100-cü ilə qədər dəniz səviyyəsini əlavə 0,9 metr yüksəldə bilər. Bu isə əvvəlki proqnozlara əsasən nəzərdə tutulan 0,9 metrlik artıma əlavə olunacaq.
Alimlərin bildirdiyinə görə, buzlaqlar hazırkı sürətlə əriməyə davam edərsə 2500-cü ilə qədər dəniz səviyyəsi təxminən 15 metr arta bilər.
2013-cü ildə BMT-nin İqlim Dəyişikliyi üzrə Paneli dəniz səviyyəsinin 2100-cü ilə qədər 0,9 metrdən çox yüksələcəyini proqnozlaşdırmışdı.
Araşdırmanın həmmüəllifi, geologiya professoru Robert DeKonto bildirib ki, bu vəziyyət dəniz səviyyəsinə yaxın yerləşən şəhərlər üçün fəlakətli nəticələrə səbəb ola bilər. O, qeyd edib ki, Bostonda əsrin sonuna qədər dəniz səviyyəsi 5 futdan (təxminən 1,5 metr) artıq qalxa bilər.
Dəniz səviyyəsinin yüksəlməsi riski altında olan digər şəhərlər arasında London, Nyu-York, Şanxay, Honkonq, Sidney və Venesiya da var.
Pensilvaniya Dövlət Universitetinin Yer və Ətraf Mühit Sistemləri İnstitutunun aparıcı alimlərindən biri və hesabatın digər müəllifi David Pollard bildirib ki, bu nəticələr istixana qazı emissiyalarının daha çox azaldılmasına səbəb olmalıdır.