Türkiyənin müdafiə və aviasiya sahəsində aparıcı şirkətlərindən olan “Baykar” ilə İtaliyanın tanınmış aviasiya və müdafiə şirkəti “Leonardo” ilk orta sinif pilotsuz uçuş aparatlarının (PUA) istehsalına hazırlaşır. Bu aparatların təqdimatının aprel ayında keçirilməsi gözlənilir.

“Leonardo” şirkətinin baş icraçı direktoru Roberto Çinqolani “Anadolu” agentliyinə verdiyi açıqlamada bildirib ki, “Leonardo” ilə “Baykar” arasında yaradılan birgə təşəbbüs əvvəlcədən müəyyən edilmiş yol xəritəsinə uyğun şəkildə irəliləyir.

Martın 12-də şirkətin investorlar üçün təşkil etdiyi tədbirdə çıxış edən R.Çinqolani qeyd edib ki, bir neçə yüz kiloqram yük daşıma qabiliyyətinə malik orta sinif pilotsuz uçuş aparatları aprel ayında “Ronchi dei Legionari” müəssisəsində istehsal olunmağa başlanacaq. O əlavə edib ki, şirkət digər müəssisələrdə də istehsal hazırlıqlarını davam etdirir.

R.Çinqolani bildirib ki, sözügedən pilotsuz uçuş aparatları Avropa istehsalı dronlara artan tələbatı qarşılamaq üçün İtaliyada sertifikatlaşdırılacaq. Onun sözlərinə görə, “Leonardo” və “Baykar” Avropada yerli pilotsuz uçuş aparatlarının istehsalında mövcud olan boşluğu aradan qaldırmaq məqsədilə bir-birini tamamlayan güclü əməkdaşlıq çərçivəsində fəaliyyət göstərir. Bu əməkdaşlıq nəticəsində “Baykar” hava platformasını inkişaf etdirir, “Leonardo” isə kəşfiyyat sistemlərini və sahəyə xas texnologiyaları təmin edir.

R.Çinqolani həmçinin qeyd edib ki, birgə istehsal olunacaq pilotsuz uçuş aparatları 2025-ci ilin noyabr ayında elan edilmiş “Michelangelo Dome” hava hücumundan müdafiə sistemində rol oynaya bilər. Həmin sistemin ilk sınağının ilin sonuna qədər Ukraynada keçirilməsi gözlənilir.

Bildirilir ki, “Leonardo–Baykar” tərəfdaşlığı çərçivəsində hazırlanan pilotsuz uçuş aparatları bu hava hücumundan müdafiə qalxanına inteqrasiya oluna bilər.