Türkiyə Livan ilə Cənubi Kipr Yunan Administrasiyası arasında imzalanan yenilənmiş Eksklüziv İqtisadi Zona (EEZ) delimitasiya müqaviləsini tənqid edərək bildirib ki, sənəd Kiprdəki türklərin hüquqlarını nəzərə almır və bütün adanı təmsil etmir.

Türkiyə Xarici İşlər Nazirliyinin sözçüsü Öncü Keçeli rəsmi ‘‘X’’ hesabında etdiyi paylaşımda vurğulayıb ki, Cənubi Kipr Yunan Administrasiyası 2003-cü ildən bəri bölgədəki sahilyanı dövlətlərlə adadakı türklərin iştirakı olmadan ikitərəfli dəniz sərhədlərinin müəyyənləşdirilməsi barədə razılaşmalar imzalayır.

Keçelinin sözlərinə görə, Livan ilə Cənubi Kipr Yunan Administrasiyası arasında sonuncu belə müqavilə 2007-ci ildə bağlanmışdı, lakin 26 noyabrda yenidən imzalanana qədər qüvvəyə minməmişdi.

O, qeyd edib ki, baxmayaraq ki, müqavilənin əhatə etdiyi ərazi Türkiyənin kontinental şelfindən kənarda yerləşir rəsmi Ankara məsələyə Kipr probleminin daha geniş kontekstində yanaşır.

Ö.Keçeli deyib: “Livan və ya bölgədəki digər sahilyanı ölkələrin Cənubi Kipr Yunan Administrasiyası ilə bu tip müqavilələr bağlaması, adadakı türklərin bərabər hüquq və mənafeləri ilə birbaşa bağlıdır”. O həmçinin bildirib ki, Cənubi Kipr Yunan Administrasiyası nə Kiprdəki türkləri, nə də bütün adanı təmsil edir və ada ilə bağlı təkbaşına qərar vermək səlahiyyətinə malik deyil.

Sözçü beynəlxalq ictimaiyyəti, xüsusilə də regional ölkələri Cənubi Kipr Yunan Administrasiyasının birtərəfli addımlarını dəstəkləməməyə çağırıb və Kiprdəki türklərin qanuni hüquq və mənafelərini zəiflətməyə yönəlmiş cəhdlərin alətinə çevrilməməyə dəvət edib. O, vurğulayıb ki, Türkiyə, Şimali Kipr Türk Respublikası ilə birlikdə Kiprdəki türklərin hüquq və mənafelərini qətiyyətlə müdafiə etməyə davam edəcək.