Noyabrın 14-də paytaxt Ankaradakı Mürted Hava Bazası Komandanlığında təyyarə qəzasında həlak olan türk hərbçiləri ilə mərasimi keçirilib.
Mərasim zamanı şəhidlərin xatirəsi bir dəqiqəlik sükutla yad edilib və onlar üçün dualar oxunub. Əsgərlərin adları elan edildikdən sonra onların nəşləri vətənlərinə göndərilib.
Mərasimdə Türkiyə Böyük Millət Məclisinin sədri Numan Kurtulmuş, Milli Müdafiə naziri Yaşar Güler, Ailə və Sosial Xidmətlər naziri Mahinur Özdemir Göktaş, millət vəkilləri, Türkiyə Silahlı Qüvvələrinin yüksək rütbəli komandirləri, Ankara valisi Vasip Şahin, Azərbaycan Hərbi Hava Qüvvələri komandanı general-mayor Namiq İslamzadə, Azərbaycanın Türkiyədəki səfiri Rəşad Məmmədov və şəhidlərin ailələri iştirak ediblər.
Prezident Rəcəb Tayyib Ərdoğan şəhid ailələrinə dərin hüznlə başsağlığı verib və dualarını çatdırıb.
Qeyd edək ki, Türkiyə Hərbi Hava Qüvvələrinə məxsus “C-130” tipli hərbi yük təyyarəsi noyabrın 11-də Azərbaycan–Gürcüstan sərhədi yaxınlığında qəzaya uğramışdı. Qəza nəticəsində 20 hərbçi şəhid olmuşdu.
