Türkiyə Milli Kəşfiyyat Təşkilatının (MİT) rəhbəri İbrahim Kalın İstanbulda “Həmas” siyasi rəhbərliyinin sədri Xəlil əl-Həyya və onu müşayiət edən heyətlə görüş keçirib. Görüşdə Qəzza üzrə sülh planının ikinci mərhələsinin tədbiqinə yönəlmiş səylər müzakirə olunub.

"Anadolu" agentliyinə istinadən bildirilir ki, iclasda sülh planının ikinci mərhələsinə keçid üçün hazırlanan yol xəritəsinə diqqət yetirilib. İştirakçılar “Həmas”ın təklifə verdiyi müsbət cavabı xüsusi vurğulayıblar.

Hər iki tərəf İsrailin əldə olunan sülh planını tədbiq etmək əvəzinə Qəzzada hərbi təcavüzünü artırmasından narahatlığını ifadə edib. Tərəflər İsrailin törətdiyi hücumları bir an əvvəl dayandırmaq üçün beynəlxalq ictimaiyyətin hərəkətə keçməsinin vacibliyini vurğulayıblar.

Beynəlxalq fəallıq

Görüşdə İsrail qüvvələrinin Qəzzada soyqırım törətməyə davam etməsiylə yanaşı işğal altındakı İordan çayının qərb sahili və Şərqi Qüdsdə də fələstinlilərin hüquqlarının pozulması məsələsi nəzərdən keçirilib.

İştirakçılar işğal olunmuş ərazilərdə davam edən qanunsuz İsrailin məskunlaşma fəaliyyətlərini və qeyri-qanuni israilli köçkünlərin törətdiyi zorakılıq hallarını da müzakirə ediblər.

Türkiyənin həm siyasi səylər, həm də humanitar yardımları artırmağı hədəfləyən təşəbbüslərlə Qəzzaya dəstəyini bir daha təsdiqlədiyi qeyd olunur. İştirakçılar Qəzzada sülhün bərqərar olmasına kömək etmək məqsədilə Türkiyə, Qətər və Misirin birgə səylərini yenidən bəyan ediblər.

“Həmas” heyəti həmçinin Ankara administrasiyasının Qəzzada sülhün təmin edilməsi istiqamətindəki səylərinə görə Türkiyə Prezidenti Rəcəb Tayyib Ərdoğana təşəkkürünü bildirib.