Türkiyə Prezidenti Rəcəb Tayyib Ərdoğan ABŞ Prezidenti Donald Tramp ilə danışıqlar aparmaq üçün Vaşinqtona gəlib.

Tramp Ərdoğanı bu gün (25 sentyabr) Ağ Evdə qəbul edəcək və onlar ikitərəfli münasibətlər və regional məsələləri müzakirə edəcəklər.

Görüşdə ticarət, investisiya və müdafiə sənayesi kimi məsələlərin müzakirə olunacağı gözlənilir.

Dövlət başçısı Ərdoğan daha əvvəl verdiyi açıqlamada “Prezident Tramp ilə görüşümüzün qlobal sülh baxışımız çərçivəsində bölgəmizdəki müharibə və münaqişələrin sona çatmasına töhfə verəcəyinə və ölkələrimiz arasında əməkdaşlığı daha da gücləndirəcəyinə inanıram” deyib.

Ərdoğan BMT Baş Assambleyasının bu ilki sessiyasında iştirak etmək üçün səfərdə olduğu Nyu-Yorkda sentyabrın 23-də Tramp və birinci xanım Melaniya Tramp tərəfindən dövlət başçıları və onların həyat yoldaşları şərəfinə təşkil edilən qəbulda iştirak edib.

Bundan əlavə Ərdoğan Tramp ilə birlikdə Baş Assambleyadan kənarda Qəzza ilə bağlı çoxtərəfli görüşdə iştirak edib.

Qapalı keçirilən görüşlə bağlı əlavə məlumat paylaşılmasa da, Ərdoğan görüşdən sonra danışıqların “çox məhsuldar və müsbət” keçdiyini bildirib və məmnunluğunu ifadə edib.

Ərdoğan Nyu-Yorkdakı çoxmərtəbəli Türk diplomatik mərkəzi olan Türk Evinin qarşısında jurnalistlərə deyib: “Biz çox, çox məhsuldar və müsbət bir görüşü yeni başa çatdırdıq. Nəticələri xeyirli olsun”.

Vaşinqtonda olduğu müddətdə Ərdoğan ABŞ prezidentinin rəsmi qonaq iqamətgahı olan “Blair House”da qalacaq.