Rəsmi Ankara bu addımın diqqəti İsrailin fələstinlilərə qarşı törətdiyi cinayətlərdən başqa tərəfə yönəltməyi hədəflədiyini və əslində Netanyahunun üzərində onsuz da mövcud olan təzyiqi əks etdirdiyini bildirib.
Türkiyə İsrailin 1915-ci il hadisələrini tanımaq qərarını qınayaraq, bu qərarı fələstinlilərə qarşı törətdiyi cinayətləri ört-basdır etməyi hədəfləyən siyasi həmlə kimi qiymətləndirib.
Türkiyə Xarici İşlər Nazirliyi iyunun 28-də verdiyi açıqlamada “Bütün dünyanın gözü qarşısında Fələstin xalqına qarşı sistematik zülm tətbiq edən və Beynəlxalq Ədalət Məhkəməsində qəzzalılara qarşı soyqırımı törətmək ittihamı ilə mühakimə olunan İsrail hökuməti 1915-ci il hadisələri ilə bağlı qəbul etdiyi siyasi qərarla öz cinayətlərini ört-basdır etməyi hədəfləyir”, -deyə bildirib.
Nazirlik bu qərarın hüquqi və tarixi həqiqətlərə məhəl qoymadığını və Qəzzadakı fələstinlilərə qarşı törədilən cinayətlərlə əlaqədar olaraq Beynəlxalq Cinayət Məhkəməsi tərəfindən barəsində həbs qərarı çıxarılan Netanyahu və tərəfdarları üzərindəki təzyiqi əks etdirdiyini vurğulayıb.
Türkiyə “İsrailin regiondakı ekspansionist və sabitliyi pozan siyasətinə” son qoymaq üçün işləməyə davam edəcəyini, eyni zamanda “Fələstin xalqı başda olmaqla mülki şəxslərə qarşı törətdiyi cinayətlərə” görə Netanyahu hökumətinin cavab verməsi üçün də səy göstərəcəyini açıqlayıb.
Hər iki tərəfin də ağrı-acı çəkdiyi bir faciə
Qeyd edək ki, 1915-ci il hadisələrinin qondarma “soyqırımı” kimi tanınmasına etiraz edən Türkiyə bunları hər iki tərəfin də itkilər verdiyi bir faciə kimi xarakterizə edir.
Rəsmi Ankara indiyə qədər dəfələrlə bu məsələni araşdırmaq üçün Türkiyə və Ermənistandan olan tarixçilər ilə beynəlxalq ekspertlərdən ibarət müştərək komissiyanın yaradılmasını təklif edib.
2014-cü ildə dövrün baş naziri olan və hazırda da prezident vəzifəsini icra edən Rəcəb Tayyib Ərdoğan 1915-ci il hadisələrində həyatını itirən ermənilərin nəvələrinə başsağlığı vermişdi.
İsrail 2023-cü ilin oktyabr ayından bəri Qəzzada təxminən 73 min fələstinlini öldürüb və 173 mindən çox insanı yaralayıb. Soyqırımı regiondakı mülki infrastrukturun böyük bir hissəsini məhv edərkən, humanitar şərait hələ də ağır olaraq qalır.
Beynəlxalq Cinayət Məhkəməsi 21 noyabr 2024-cü il tarixində Qəzzada törədilən müharibə cinayətləri və bəşəriyyətə qarşı cinayətlər səbəbindən Netanyahu və keçmiş müdafiə naziri Yoav Qallant haqqında həbs qərarı çıxarıb.
İsrail, həmçinin Fələstinə qarşı apardığı müharibə səbəbindən Beynəlxalq Ədalət Məhkəməsində soyqırımı iddiası ilə qarşı-qarşıyadır.
