Türkiyə Milli Müdafiə Nazirliyi Şimali Kipr Türk Respublikasına (ŞKTR) altı ədəd “F-16” qırıcı təyyarəsi və müasir hava hücumundan müdafiə sistemlərinin yerləşdirilməsini təsdiqləyib. Bu addım, Yaxın Şərqdə genişlənən müharibə fonunda ŞKTR-nin təhlükəsizliyini təmin etmək üçün hazırlanan mərhələli planın bir hissəsidir.
Milli Müdafiə Nazirliyi regional gərginliyin artdığı bir dövrdə Kipr türklərinin təhlükəsizliyinin prioritet olduğunu vurğulayıb və bu qərarı Şərqi Aralıq dənizindəki qeyri-sabitliklə əlaqələndirib.
Qərar İsrail və ABŞ-ın İrana qarşı davam edən müharibəsi və İranın Türkiyə hava məkanına daxil olmadan qarşısı alınan raket hücumu barədə xəbərlərdən sonra qəbul edilib.
Qeyd edək ki, adanın yunan hissəsində Böyük Britaniyaya məxsus hərbi baza yerləşir.
1983-cü ildə qurulan və Türkiyə tərəfindən tanınan ŞKTR 1960-cı il Zəmanət Müqaviləsinə əsasən Ankaranın qarant statusu altında türk hərbi qüvvələrinə ev sahibliyi edir.
