Noyabrın 1-də (bu gün) açıqlanan ilkin nəticələrə görə, dövlət televiziyasında yayımlanan məlumatlarda Samia Suluhu Hasanın hər seçki dairəsində səslərin 95 faizindən çoxunu topladığı bildirilib. Yekun nəticələrin bir neçə saat ərzində açıqlanacağı, prezidentin isə gün ərzində and içəcəyi qeyd olunub.
Ölkənin əsas müxalifət partiyası olan “Chadema”nın verdiyi açıqlamada bildirilib ki, oktyabrın 29-u səsvermə günündən bəri baş verən etirazlar zamanı təhlükəsizlik qüvvələri yüzlərlə insanı öldürüb. Həmçinin məsələ ilə bağlı BMT “ölüm və yaralanma halları ilə bağlı məlumatlardan” narahatlığını ifadə edib.
“Chadema”nın sözçüsü AFP-yə bildirib ki, xəstəxana və klinikalardan əldə edilən məlumatlara əsasən, təxminən 700 nəfər öldürülüb. Dar-əs-Səlamdakı təhlükəsizlik mənbələri və bir diplomat da ölənlərin sayının “yüzlərlə” olduğunu təsdiqləyib.
Hakimiyyət interneti kəsib, ölkə üzrə komendant saatı elan edib və jurnalistlərin fəaliyyətinə məhdudiyyətlər qoyulub. Bu səbəbdən hadisələri müstəqil şəkildə yoxlamaq çətinləşib.
Hökumət isə həddən artıq güc tətbiqi iddialarını rədd edir. Xarici işlər naziri Mahmud Thabit Kombo “Əl-Cəzirə” telekanalına bildirib ki, ölənlər və yaralananlarla bağlı rəsmi məlumat yoxdur.
Qeyd edək ki, hüquq-müdafiə təşkilatlarının məlumatına görə, seçki qabağı müxalifət nümayəndələrinə qarşı həbslər və təzyiqlər baş verib. “Chadema” partiyasının seçkilərdə iştirakına icazə verilməyib, partiya lideri isə hazırda dövlətə xəyanətdə ittiham olunaraq məhkəmə qarşısındadır.
İctimai narazılığın böyük hissəsi prezidentin oğlu, Əbdülhalim Hafiz Ameir üzərində cəmlənib. Müxalifət onu etirazların zorakılıqla yatırılmasına rəhbərlik etməkdə ittiham edir.
Siyasi analitiklər hesab edirlər ki, 2021-ci ildə sələfi Con Maqufulinin ölümündən sonra hakimiyyətə gələn Samia Suluhu Hasan son seçkilərlə partiya daxilində nəzarəti tam ələ almaq və daxili müxalifəti neytrallaşdırmaq məqsədi güdür.
Silahlı qüvvələrin baş qərargah rəisi Ceykob Mkunda oktyabrın 30-da etirazçıları “cinayətkar” adlandıraraq prezidentə dəstəyini ifadə edib.
