Türkiyə Prezidenti Rəcəb Tayyib Ərdoğan mayın 1-də Türkiyə Radio və Televiziya Qurumunu (TRT) 62-ci ildönümünü münasibəti ilə təbrik edib. Dövlət rəhbəri R.T.Ərdoğan ictimai yayım orqanının qlobal mediada gördüyü işlərin əhəmiyyətinə işarə edərək artan dezinformasiyaya qarşı güclü amil kimi qiymətləndirib.
TRT-nin baş direktoru Mehmet Zahid Sobacıya ünvanladığı təbrik mesajında ölkə başçısı R.T.Ərdoğan bildirib ki, TRT çoxdilli yayımlarını gücləndirib və rəqəmsal platformalara uyğunlaşaraq “ölkəmizin səsi” və “millətimizin yaddaşı” olmağa davam edir.
Prezident Ərdoğan yayımladığı təbrik mesajında deyilir:
“Yarandığı gündən etibarən ictimai yayımçılıq məsuliyyətini layiqincə yerinə yetirməyə çalışan Türkiyə Radio və Televiziya Qurumunun 62-ci ildönümünü ən səmimi şəkildə təbrik edirəm.
Texnologiyadakı inkişaflara uyğun olaraq yayım keyfiyyətini hər gün artıran və fəaliyyət sahəsini genişləndirən TRT bu gün də bütün kanalları və çoxdilli yayımları ilə radio və televiziya yayımı sahəsində qabaqcıl qurumumuzdur. Dəyişən izləmə və dinləmə vərdişlərinə, rəqəmsal dünyaya uğurla uyğunlaşan TRT ölkəmizin səsi, millətimizin yaddaşı və məsuliyyətli yayımçılığın öncüsü olma xüsusiyyətini qətiyyətlə davam etdirir.
“Türkiyə yüz ili” vizyonumuzu yayım sahəsinə daşıyan TRT-nin ölkəmizin haqlı mövqelərini və apardığımız ədalət mübarizəsini beynəlxalq ictimaiyyətə daha güclü şəkildə çatdırmaq istiqamətində üzərinə götürdüyü rol böyük əhəmiyyət daşıyır. Qlobal miqyasda artan dezinformasiyaya qarşı həqiqəti əsas götürən yayım anlayışı ilə beynəlxalq mediada mühüm mənbəyə çevrilən TRT-nin bu gün çatdığı səviyyə millətimiz üçün iftixar mənbəyidir.
Bir çox şəxsin yetişməsinə şərait yaradan, radio və televiziya sektorunda bir məktəb halına gələn TRT-dən uğurlu, keyfiyyətli və sahəyə istiqamət verən orijinal işlərinə yenilərini əlavə etməsini gözləyirəm.
Bu münasibətlə TRT ailəsinin bütün üzvlərinə əməkləri və səyləri üçün təşəkkür edir, TRT-nin qarşıdakı dövrdə də eyni əzm və qətiyyətlə fəaliyyətini davam etdirəcəyinə, ölkəmizin, millətimizin və bütün məzlumların güclü səsi olmağa davam edəcəyinə ürəkdən inanıram.”
Qeyd edək ki, “Türkiyə yüz ili” Türkiyə Prezidenti Rəcəb Tayyib Ərdoğanın Respublikanın 2023-cü ildəki 100 illiyi münasibətilə açıqladığı, diplomatiya, müdafiə, iqtisadiyyat və media sahələrində Türkiyənin qlobal təsirini artırmağı hədəfləyən, strateji kommunikasiya və beynəlxalq əlçatanlığa güclü vurğu edən əsas siyasi vizyon kimi ön plana çıxır.
Yarandığı gündən bu günə qədər yayımçılığın bütün sahələrində qabaqcıl mövqeyini qoruyan TRT televiziya və radio yayımı ilə yanaşı, kino, qlobal məsələlər, peşəkar təcrübə paylaşımı, uşaqlar üçün xüsusi verlişlər, gənc yayımçılara dəstək və daha bir çox mühüm fəaliyyət istiqamətləri üzrə təşkil etdiyi milli və beynəlxalq tədbirlər, festivallar, əməkdaşlıqlar və mükafatlandırma proqramları vasitəsilə geniş auditoriyalara ciddi töhfələr verir. İctimai yayımçılıq prinsipindən geri çəkilmədən izlənmə yarışında bir çox kanal və məzmunu ilə zirvədəki mövqeyini qoruyur, ortaq kino layihələri ilə dünya ekranlarında milyonlarla insan tərəfindən izlənir və qazandığı nüfuzlu beynəlxalq mükafatları uğur portfelinə əlavə edir.
