ABŞ prezidenti Donald Tramp İranla aparılan hər hansı dialoq barədə yayılan xəbərləri təkzib edərək bildirib ki, onun administrasiyası nə Tehranla danışıqlar aparır, nə də bu ölkəyə hər hansı yardım təklif edir.
İyunun 30-da jurnalistlərə açıqlama verən D.Tramp ABŞ-ın İranın nüvə obyektlərini “tamamilə məhv etdiyini” vurğulayıb.
Sərt mövqeyini davam etdirən D.Tramp deyib: “Mən İranla heç bir əlaqə saxlamamışam. Onlara heç nə təklif etmirik.”
O, bu açıqlamanı xəbər agentliklərinin onun administrasiyasının İrana mülki nüvə enerjisi proqramını dəstəkləmək üçün 30 milyard dollara qədər vəsait əldə etməsinə kömək etmək fikrində olduğunu iddia etməsindən bir neçə gün sonra verib. Sözügedən məlumatlar Trampın maksimum təzyiq strategiyası ilə bağlı əvvəlki mövqeyi ilə ziddiyyət təşkil edirdi.
Donald Tramp iyunun 27-də yayılan bu xəbərləri “dezinformasiya” adlandırıb. Məlumatlara əsasən, D.Tramp administrasiyasının bəzi üzvləri İrana sülhməramlı nüvə proqramı çərçivəsində maliyyə və ya texniki yardım göstərilməsini nəzərdən keçiriblər.
