SSSR dövrünə aid bir kosmik aparat Venera planetinə uğursuz buraxılış cəhdindən yarım əsrdən artıq bir müddət sonra mayın 9-da Yerə düşüb.
Avropa İttifaqının Kosmik Müşahidə və İzləmə Sistemi müxtəlif analizlər və kosmik aparatın sonrakı orbitlərdə görünməməsi əsasında onun nəzarətsiz şəkildə atmosferə yenidən daxil olduğunu təsdiqləyib. Avropa Kosmik Agentliyinin kosmik tullantılar ofisi də bu aparatın Almaniyadakı radar stansiyasında görünməməsi səbəbindən orbitə təkrar daxil olduğunu bildirib.
Kosmik aparatın Yer kürəsinin dəqiq hansı nöqtəsinə düşdüyü və yarım tonluq bu qurğunun atmosferdən keçərkən hansı hissələrinin salamat qaldığı müəyyənləşdirilməyib. Mütəxəssislər aparatın Venera kimi Günəş sisteminin ən isti planetinə enəcək şəkildə dizayn edildiyini nəzərə alaraq bəzi hissələrinin – hətta tamamilə – Yerə çata biləcəyini bildiriblər.
Eyni zamanda, alimlər qeyd ediblər ki, kosmik aparatın qalıqlarının insanlara zərər yetirmə ehtimalı son dərəcə azdır.
Yer orbitində ilişib qaldı
1972-ci ildə Sovet İttifaqı tərəfindən buraxılmış və “Kosmos 482” adı ilə tanınan kosmik aparat Veneraya yönəlik kosmik missiyalardan biri olub. Lakin raket nasazlığı səbəbindən Yer orbitindən çıxa bilməyib və orada ilişib qalıb.
Uğursuz buraxılışdan sonrakı 10 il ərzində kosmik aparatın böyük hissəsi Yerə geri düşüb.
Orbitinin tədricən kiçilməsi nəticəsində cazibə qüvvəsinə daha çox tab gətirə bilməyən aparatın təqribən bir metr diametrində olan sferik eniş bölməsi Yerə düşən son hissə olub.
Mütəxəssislər bildirirlər ki, eniş aparatı titanyumla örtülüb və çəkisi 495 kiloqramdan artıqdır.
Kosmik aparatın düşüşünü izləyən alimlər, hərbçilər və digər mütəxəssislər aparatın tam olaraq nə vaxt və hara düşəcəyini əvvəlcədən dəqiq müəyyən edə bilməyiblər. Günəşdəki aktivlik və aparatın uzun müddət kosmosda qalması nəticəsində yaranan aşınmalar bu qeyri-müəyyənliyi daha da artırıb.
ABŞ Kosmik Komandanlığının mayın 9-da səhər saatlarına olan məlumatına əsasən, aparatın yox olduğunu təsdiqləmək üçün orbitdən daxil olan məlumatları toplayıb və analiz edib.
ABŞ Kosmik Komandanlığı hər ay orbitə yenidən daxil olan onlarla hadisəni adi qaydada izləyir. Rəsmilərə görə, “Kosmos 482”ni digərlərindən fərqləndirən məqam aparatın orbitə yenidən daxil olarkən salamat qalma ehtimalının daha yüksək olmasıdır.
Bundan əlavə, aparat nəzarətsiz şəkildə, hər hansı bir müdaxilə olmadan Sakit okean və digər geniş su hövzələri üzərində köhnə peykləri və digər kosmik tullantıları izləyən uçuş nəzarətçiləri tərəfindən müşahidə olunaraq atmosferə daxil olub.
