Tailand və Kamboca liderləri beşinci günə daxil olan və beynəlxalq sülh çağırışlarına baxmayaraq davam edən ölümcül sərhəd toqquşmalarını həll etmək üçün Malayziyada fövqəladə toplantı keçirir.
Kambocanın Baş naziri Hun Manet və Tailandın müvəqqəti Baş naziri Phumtham Veçayaçay arasında Cənub-Şərqi Asiya Ölkələri Assosiasiyasının (ASEAN) sədri kimi danışıqlara ev sahibliyi edən Malayziyanın Baş naziri Ənvər İbrahimin rəsmi iqamətgahında danışıqların aparılması planlaşdırılır.
Toqquşmalar iyulun 24-də sərhəddə mina partlaması nəticəsində beş Tailand əsgərinin yaralanmasından sonra başlayıb. Hər iki tərəf insidenti qarşı tərəfin başlatdığını iddia edir. Qarşıdurmalarda ən azı 35 nəfər həlak olub, hər iki tərəfdən 260 mindən çox insan öz vətənlərini tərk etmək məcburiyyətində qalıb. Hər iki ölkə səfirlərini geri çağırıb, Tailand isə Kamboca ilə bütün sərhəd keçid-məntəqələrini bağlayıb. Yalnız Kambocalı miqrant işçilərin evlərinə qayıtmasına icazə verilib.
Hər iki tərəfin qoşunları hazırda sərhəd bölgələrində qarşıdurmaların davam etdiyini bildiriblər. "Associated Press" müxbirlərinin verdiyi məlumata görə, Kambocanın Oddar Meançey əyalətinin Samronq şəhərində səhər saatlarında atəş səsləri eşidilib.
Ənvər İbrahim iyulun 27-də gecə deyib ki, hər iki tərəf sülh üçün şərtlər təklif edəcək, lakin "vacib olan dərhal atəşkəsdir". Malayziyanın milli xəbər agentliyi "Bernama"nın məlumatına görə, baş nazir, "Ümid edirəm ki, bu işə yarayar. Bir çox başqa ölkələrdə olduğu kimi pis olmasa da zorakılığı dayandırmalıyıq" deyib.
Görüş ABŞ prezidenti Donald Trampın ABŞ-a birbaşa təzyiq göstərməsindən və hərbi əməliyyatların davam edəcəyi təqdirdə ABŞ-ın hər iki ölkə ilə ticarət razılaşmalarını davam etdirməyəcəyi xəbərdarlığından sonra baş tutub.
Kuala Lumpura yola düşməzdən əvvəl Banqkokda jurnalistlərə açıqlama verən Phumtham Veçayaçay ABŞ və Çin nümayəndələrinin də müşahidəçi qismində görüşə qatılacağını bildirib. O, əsas diqqətin atəşkəsin dərhal elan edilməsinə yönəldiləcəyini bildirməklə yanaşı, Kambocanın hücumlarını dayandırmaması səbəbindən etimad problemlərinin ola biləcəyini vurğulayaraq deyib: "Biz Kambocaya heç bir etibarımız olmadığını açıq şəkildə bildirdik. Onların etdikləri hər şey bu problemin həllində səmimi olmadıqlarını nümayiş etdirir. Ona görə də o vaxtdan bəri nə edəcəyini təfərrüatlı şəkildə izah etməlidirlər".
İki ölkə arasında zorakılıq təcavüz etməmək, dinc dialoq və iqtisadi əməkdaşlıqla fəxr edən 10 üzvlü regional blok olan ASEAN üzvləri arasında açıq hərbi münaqişənin nadir nümunəsidir.
ASEAN xarici işlər nazirləri ölənlərin sayının artması, ictimai əmlakın dağıdılması və çoxlu sayda insanın sərhədyanı ərazilərdə didərgin düşməsi ilə bağlı narahatlıqlarını təkrarlayıblar. Nazirlər iki ölkəni mübahisələrini danışıqlar yolu ilə həll etməyə çağırıblar və danışıqlar zamanı orta yol tapmaq səylərini dəstəklədiklərini bildiriblər.
Münaqişə Papa XIV Leo-nun da diqqətini çəkib. Roma Papası bildirib ki, o, bütün dünyada müharibələrdən əziyyət çəkənlər üçün, "xüsusilə də Tailand və Kamboca arasındakı sərhəd toqquşmalarından zərər çəkmiş uşaqlar və köçkün ailələr üçün" dua edir.
Tailand və Kamboca arasındakı 800 kilometrlik sərhəd onilliklər ərzində mübahisəli ərazi olub, lakin keçmiş toqquşmalar məhdud və qısamüddətli olub. May ayında Kamboca əsgərinin ölümü ilə nəticələnən və diplomatik böhrana səbəb olan qarşıdurma nəticəsində yaranan son gərginlik Tailandın daxili siyasi həyatını sarsıdıb.
