Türkiyə Milli Müdafiə Nazirliyi Limni və Kerpe adalarının statusu ilə bağlı Yunanıstanın hərəkətlərinin beynəlxalq müqavilələri pozduğunu və bu addımların ikitərəfli münasibətlərə xələl gətirdiyini bildirib.
Nazirlik martın 12-də verdiyi açıqlamada Yunanıstanın adalarla bağlı təşəbbüslərinin beynəlxalq hüquqa uyğun olaraq imzalanmış müqavilələrə zidd olduğunu qeyd edib.
Açıqlamada "Yunanıstanın qaydalara uyğun olaraq bağlanmış müqavilələrə zidd şəkildə adaların statusunu pozan cəhdləri həm hüquqi pozuntu yaradır, həm də qonşuluq-müttəfiqlik münasibətlərimizə xələl gətirir" deyilib.
Açıqlamada həmçinin Türkiyənin Yunanıstanın "bölgədə yaşanan böhranları fürsətə çevirməyə yönəlmiş" addımlarını rədd etdiyi, Ankaranın “bu istiqamətdə bütün lazımi tədbirləri” gördüyü vurğulanıb.
Qeyd edək ki, Türkiyə Egey və On İki Adanın silahlandırılmasının 1923-cü il Lozanna müqaviləsi və 1947-ci il Paris Sülh müqaviləsini pozduğunu dəfələrlə qeyd edib. Bu adaların mülki zonalar kimi qalması nəzərdə tutulub.
Keçən həftə rəsmi Ankara adaların silahlandırılmasına yönəlmiş (fait accompli) həmlələrinə qarşı xəbərdarlıq etmişdi.
Xarici İşlər Nazirliyinin sözçüsü Öncü Keçeli "X" sosial media platformasında yayımlanan açıqlamasında, "Lozanna müqaviləsi və Paris Sülh müqaviləsinə uyğun olaraq müəyyən edilən Şərqi Egey adaları və On İki Adanın obyektiv hüquqi statusu aydındır və müzakirə mövzusu deyil" deyə bildirib.
Yunanıstan 2025-ci ilin noyabrında ənənəvi müdafiədən daha aqressiv bir sistemə keçidi təmsil edən "Aşil qalxanı" doktrinasını qəbul edib.
İsrail Yunanıstana PULS raket artilleriyası, “Spike” raketləri və "David's Sling" və ya "Barak MX" kimi potensial inteqrasiyalar daxil olmaqla müdafiə sistemləri tədarük edərək kömək edir. Bunlar Yunanıstanın yeni doktrinasının əsas komponentlərini təşkil edir.
