Türkiyənin bir sıra dövlət qurumları ölkə Prezidenti Rəcəb Tayyib Ərdoğanı hədəf alan açıqlamalarına görə Benyamin Netanyahunu tənqid edərək bildiriblər ki, “Onun heç kimə dərs verməyə nə əxlaq baxımında hörməti, nə də legitimliyi var.”

Məsələylə bağlı Türkiyə prezident administrasiyasının ictimaiyyətlə əlaqələr idarəsinin rəhbəri Burhanəddin Duran aprelin 11-də “X” sosial şəbəkəsindəki paylaşımında qeyd edib: “Qəzzada soyqırım törədən və bölgədə yeddi ölkəyə hücum edən B.Netanyahu acizlik içində prezidentimizi hədəf alma cəsarəti göstərir. B.Netanyahu barəsində həbs qərarları çıxarılmış və artıq dostu qalmamış bir cinayətkardır. O, insanlığa qarşı törətdiyi cinayətlərə görə gec-tez cavab verəcək.”

Onun sözlərinə görə, B.Netanyahunun siyasəti hakimiyyətdə qalmaq naminə regionu qeyri-sabitliyə və münaqişəyə sürükləyir. B.Duran həmçinin rəsmi Ankaranın “daha ədalətli, sülhsevər və təhlükəsiz dünya naminə zalımlara qarşı mübarizə” mövzusunda qətiyyətini bir daha vurğulayıb.

Həqiqətlər onu narahat edir

Türkiyə Xarici İşlər Nazirliyi də B.Netanyahunun açıqlamalarına sərt reaksiya göstərərək bildirib ki, onun Türkiyə Prezidentini hədəf almasının səbəbi bütün platformalarda səsləndirilən həqiqətlərin yaratdığı narahatlıqdır.

Nazirlik B.Netanyahunu törətdiyi cinayətlər və regional təcavüzkarlıq siyasəti səbəbilə “bu dövrün Hitleri” kimi xarakterizə edib.

Açıqlamada həmçinin Beynəlxalq Cinayət Məhkəməsi tərəfindən çıxarılan həbs qərarına diqqət çəkilərək, B.Netanyahunun davam edən sülh danışıqlarını pozmaq və genişlənmə siyasətini davam etdirmək cəhdlərinə qarşı xəbərdarlıq edilib.

Nazirlik əlavə edib ki, Türkiyə günahsız mülki şəxsləri dəstəkləməkdə və B.Netanyahunun törətdiyi cinayətlərə görə məsuliyyətə cəlb olunması istiqamətində qətiyyətli mövqeyini davam etdirir.

Xatırladaq ki, İsrail qüvvələri 2023-cü ilin oktyabr ayında Qəzzaya qarşı soyqırım törətməyə başlayıb. Həmin vaxtdan etibarən 72 mindən çox fələstinlinin öldürüldüyü, təxminən 172 min nəfərin yaralandığı və bölgədəki mülki infrastrukturun təxminən 90 faizinin dağıdıldığı bildirilir.

Bununla yanaşı, Beynəlxalq Cinayət Məhkəməsi 2024-cü ildə Qəzzada törədilən müharibə cinayətləri ilə bağlı Benyamin Netanyahu və keçmiş müdafiə naziri Yoav Qallant barəsində həbs qərarı çıxarıb.