Yaponiyanın cənubunda baş verən yanğın nəticəsində 170-dən çox tikiliyə ziyan dəyib

Yaponiyanın cənubundakı sahil şəhərində baş verən yanğın nəticəsində 170-dən çox tikiliyə ziyan dəyib. Hadisə nəticəsində bir nəfərin öldüyü bildirilir.

Noyabrın 19-da yayımlanan görüntülərdə Oita prefekturasının Saqanoseki bölgəsində evlərin dağıldığı və tüstünün yüksəldiyi görünür. Yerli media orqanları yanğının güclü külək səbəbindən yayıldığını bildirir.

Yaponiya Yanğın və Fəlakətlərin İdarə Edilməsi Agentliyi bildirib ki, yanğın noyabrın 18-də başlayıb və təxminən 48.900 kvadrat metr ərazini məhv edib. Hadisə nəticəsində 175 nəfər Tokiodan təxminən 770 kilometr cənub-qərbdə yerləşən ərazidəki təcili sığınacağa sığınmağa məcbur olub.

Yerli media orqanları polis mənbələrinə istinadən bir nəfərin öldüyünü açıqlayıb. Həmçinin 50 yaşlarında bir qadın yüngül yanıq xəsarətləri ilə xəstəxanaya yerləşdirilib.

Yaponiyanın Baş naziri Sanae Takaiçi soyuq havada təxliyə olunmağa məcbur olan bütün sakinlərə “keçmiş olsun” diləklərini çatdırıb.

Kyuşu Elektrik Enerjisi Şirkətinin məlumatına görə, yanğın bölgədəki təxminən 300 evdə elektrik kəsintilərinə səbəb olub.