Yaxın Şərqdəki münaqişə neftin bahalaşmasına səbəb olub
Hörmüz boğazında neft daşımalarında yaranan fasilələr qiymətlərin kəskin artmasına səbəb olub
Beynəlxalq Enerji Agentliyinə (BEA) üzv dövlətlərin bazara 400 milyon barel təcili neft ehtiyatı çıxarmaq qərarına baxmayaraq Hörmüz boğazında neft daşımalarında yaranan fasilələr qiymətlərin kəskin artmasına səbəb olub.
"Əl-Cəzirə"nin məlumatına görə, BEA-nın 32 üzv dövləti enerji bazarlarını sabitləşdirmək üçün tarixin ən böyük əlaqələndirilmiş addımını atsa da, martın 12-də neftin qiyməti bir barel üçün 101 dollar həddini keçib.
Beynəlxalq etalon hesab edilən "Brent" markalı neftin fyuçersləri Hörmüz boğazındakı gərginlik fonunda təxminən 20 faiz bahalaşıb.
GMT vaxtı ilə saat 02:00-a olan göstəricilər "Brent" neftinin müharibə başlamazdan əvvəlki səviyyədən 38 faiz daha baha satıldığını ortaya qoyur. BEA rəhbəri martın 11-də verdiyi açıqlamada bildirib ki, strateji ehtiyatların istifadəsi Yaxın Şərqdəki münaqişənin təsirini yumşaltmaq üçündür, amma qlobal tədarükdəki qeyri-müəyyənliklər qiymətlərin yüksəlməsini dayandırmır.