Kanada Fələstində zəruri islahatların aparılması və ‘‘Həmas’’ hərəkatının gələcək hökumətdə iştirakdan imtina edərək silahı təhvil verməsi şərti ilə, 2025-ci ilin sentyabrında BMT Baş Assambleyasının 80-ci sessiyasında Fələstin dövlətini tanımağa hazır olduğunu bəyan edib.
Kanada Baş naziri Mark Karni bu qərarla bağlı deyib: “Kanada İsrail dövləti ilə sülh və təhlükəsizlik şəraitində yanaşı mövcud olan, müstəqil və suveren Fələstin dövlətini dəstəkləyir. Onilliklər ərzində bu məqsədə İsrail və Fələstin arasında aparılan danışıqlara əsaslanan bir sülh prosesi ilə çatılacağına ümid edilirdi”.
M.Karni bu prosesi çətinləşdirən bir sıra amillərə diqqət çəkib, buna nümunə olaraq İordan çayının qərb sahili və Şərqi Qüdsdə İsrailin məskunlaşma fəaliyyətlərinin sürətlə genişlənməsini, İsrail parlamentinin qərb sahilinin bəzi hissələrini ilhaq etməyə yönəlmiş cəhdlərini, Qəzzada dərinləşən humanitar böhranı və bölgəyə humanitar yardımın çatdırılmasına qoyulan məhdudiyyətləri göstərib.
Fələstinin tanınması islahatlardan asılıdır
Kanadanın Fələstin dövlətini tanıması Fələstin rəhbərliyinin həyata keçirəcəyi islahatlardan asılı olacaq. Mark Karni bildirib ki, Kanada Fələstində seçkilərin keçirilməsi, zəruri islahatların həyata keçirilməsi və ‘‘Həmas’’ hərəkatının gələcək hökumətdə iştirakdan imtina edərək silahı təhvil verməsi şərti ilə BMT Baş Assambleyasının 80-cı sessiyasında sentyabrda Fələstinin dövlətçiliyini tanımağa hazırdır.
M.Karni eyni zamanda 7 oktyabrda ‘‘Həmas’’ tərəfindən əsir götürülən girovların dərhal azad edilməsi və hərəkatın silahı yerə qoyması ilə əlaqədar çağırış edib.
“Kanada hər zaman İsrailin Yaxın Şərqdə sülh və təhlükəsizlik şəraitində yaşamaq haqqını qətiyyətlə dəstəkləyib. Lakin davamlı sülhə gedən yol İsrailin təhlükəsizlik hüququnu tanıyan həyat qabiliyyətli və sabit Fələstin dövləti olmadan mümkün deyil’’, – deyə Karni bildirib.
O, həmçinin Kanadanın beynəlxalq tərəfdaşlarla birlikdə etibarlı bir sülh planı hazırlamaq və Qəzzaya geniş miqyaslı humanitar yardımın çatdırılmasını təmin etmək üçün fəal çalışacağını vurğulayıb.
“Kanada regionda ədalətli, davamlı və mənalı bir sülhün – bütün fələstinlilərin və israillilərin ləyaqətinə, təhlükəsizliyinə və arzularına hörmət edən bir nizamın qurulmasında konstruktiv tərəfdaş olacaq”, – deyə M.Karni qeyd edib.
