İndoneziyada baş verən 7,8 bal gücündə zəlzələdən sonra bölgədə sunami təhlükəsi ilə bağlı xəbərdarlıq edilib.

ABŞ Geoloji Xidmətinin (USGS) məlumatına görə, yeraltı təkanlar ölkənin Ternate sahillərində, Şimali Molukka dənizində qeydə alınıb. Zəlzələnin ocağının yerin 10 kilometr dərinliyində yerləşdiyi bildirilir.

Hadisə ilə əlaqədar ABŞ Sunami Xəbərdarlıq Sistemi episentrdən 1000 kilometr məsafədə yerləşən İndoneziya, Filippin və Malayziya sahilləri üçün təhlükəli dalğaların yarana biləcəyi barədə xəbərdarlıq yayıb.

Qeyd olunub ki, zəlzələnin episentri Şimali Maluku əyalətinin 205 mindən çox əhalisi olan Ternate şəhərindən təxminən 120 kilometr məsafədədir. Hazırda qonşu ölkələr və sahil bölgələri ehtimal olunan təbii fəlakətə qarşı yüksək hazırlıq vəziyyətinə gətirilib.