Nigeriya polisi Maiduquri şəhərində törədilən silsilə partlayışlar nəticəsində azı 23 nəfərin həlak olduğunu, 108 nəfərin isə yaralandığını açıqlayıb.
Polis sözçüsü Nahum Kennet Daso ilkin araşdırmaların hücumların kamikadzelər tərəfindən törədildiyini göstərdiyini bildirib.
Martın 16-da baş verən bu hadisələr bazar günü gecəsi hərbi posta edilən və terrorçuların məsuliyyət daşıdığı hücumdan sonra qeydə alınıb.
Bölgədə "Boko Haram" və onun rəqibi olan DEAŞ-ın Qərbi Afrika qolu ISWAP son vaxtlar ölkənin şimal-şərqində fəaliyyətlərini intensivləşdiriblər.
Nigeriyada 16 ildir davam edən terror kampaniyası indiyədək 40 mindən çox insanın ölümünə və təxminən iki milyon sakinin yurd-yuvasından didərgin düşməsinə səbəb olub. Hadisə yerində olan AFP müxbiri şəhər xəstəxanasında onlarla yaralının müalicə edildiyini və həlak olanların cəsədlərinin xəstəxana həyətinə yerləşdirildiyini bildirib.
Polis idarəsindən çərşənbə axşamı verilən son məlumata görə, zərər çəkmiş ərazilərdə vəziyyət stabilləşib.
Təhlükəsizlik qüvvələri Maiduquri və ətraf bölgələrdə yeni insidentlərin qarşısını almaq məqsədilə nəzarəti gücləndiriblər.
