Moskva meri Sergey Sobyanin Ukraynanın paytaxta qarşı genişmiqyaslı PUA hücumu həyata keçirdiyini bəyan edib. Merin sözlərinə görə, hava hücumundan müdafiə qüvvələri gecə ərzində 43 pilotsuz uçuş aparatını məhv etsə də, bir neçə dron Moskvadakı böyük neft emalı zavodunun (MNPZ) ərazisinə daxil ola bilib. Obyektin zərər görüb-görmədiyini dəqiqləşdirməyən mer hazırda hadisə yerində fəsadların aradan qaldırılması üçün işlərin aparıldığını bildirib.
Qeyd edək ki, çərşənbə axşamı günü də oxşar bir PUA hücumu Moskvanın kənarındakı böyük bir neft zavodunda yanğına və dağıntılara səbəb olmuşdu. Son hücumda eyni müəssisənin hədəf alınıb-alınmadığı hələlik məlum deyil. Kiyev son aylarda Rusiyanın hərbi xərclərini maliyyələşdirən neft və qaz gəlirlərini azaltmaq üçün bu cür enerji obyektlərini və ixrac mərkəzlərini müntəzəm olaraq hədəf alır.
Müharibənin başladığı 2022-ci ildən bəri Rusiya da demək olar ki, hər gün Ukrayna ərazilərinə dron və raketlərlə hava zərbələri endirir.
