Pentaqon noyabrın 13-də ABŞ-ın Tayvana 330 milyon dollar dəyərində qırıcı təyyarə ehtiyat hissələri və təmir materiallarının mümkün satışını təsdiqlədiyini açıqlayıb. Bu, prezident Donald Trampın yanvar ayında vəzifəyə başlamasından bəri ilk belə potensial əməliyyatdır.

Pentaqon açıqlamasında bildirib ki, təklif olunan satış alıcının mövcud və gələcək təhdidlərə qarşı F-16, C-130 və digər təyyarə donanmasının əməliyyat hazırlığını qorumaq qabiliyyətini artıracaq.

Qeyd edək ki, Çin Tayvanı öz ərazisi hesab edir və adaya nəzarət etmək üçün güc tətbiq etməyi istisna etmir. Tayvan hökuməti isə Pekinin suverenlik iddialarına qəti şəkildə qarşı çıxır və gələcəyinə yalnız Tayvan xalqının qərar verəcəyini bildirir.

Tramp bildirib ki, Çin prezidenti Si Cinpin ona Respublikaçı liderin vəzifədə olduğu müddətdə Tayvanı işğal etməyəcəyini deyib. Potensial silah satışının elanı Tramp və Si Cinpin ötən ayın sonlarında Cənubi Koreyada ticarət razılaşması əldə etmək üçün görüşdükdən sonra baş verib.

Vaşinqton Pekinlə rəsmi diplomatik əlaqələr saxlasa da, Tayvanla qeyri-rəsmi münasibətlər saxlayır və adanın ən vacib silah təchizatçısıdır.