Türkiyənin ticarət naziri Ömər Bolat 63-cü Dəməşq Beynəlxalq Sərgisi çərçivəsində Suriyanın iqtisadiyyat və sənaye naziri Nidal əl-Şaar ilə görüşüb. Görüş zamanı iki ölkə arasındakı ticarət dövriyyəsini 10 milyard dollara çatdırmaq hədəfinə doğru atılacaq addımlar müzakirə olunub.

Avqustun 26-da Türkiyənin "NSosyal" sosial media platformasında paylaşım edən Ö.Bolat görüşün xüsusilə ticarətin asanlaşdırılması, nəqliyyat və gömrük keçid məntəqələri sahələrində əməkdaşlıq imkanlarının qiymətləndirilməsinə yönəldildiyini bildirib. Həmçinin Türkiyənin özəl sektorunun Suriyanın bərpa olunması prosesində oynaya biləcəyi rol da nəzərdən keçirilib.

Hər iki nazir aprel ayında keçirilən Türkiyə-Suriya Birgə İqtisadi və Ticarət Komissiyasının iclasında əldə olunan razılaşmaların həyata keçirilməsinə sadiq qaldıqlarını bir daha təsdiqləyiblər.

Nazir Ömər Bolat daha sonra Suriya İnvestisiya Agentliyinin yeni sədri Əhməd Rəvvad Ramadana ilə görüşərək Türkiyə şirkətlərinin Suriyadakı investisiya planları və imkanlarını müzakirə edib.

Görüş zamanı investisiya mühitini daha proqnozlaşdırılan etmək üçün atıla biləcək addımlar, eləcə də Suriyanın Kamune və Sarakib bölgələrindəki mütəşəkkil sənaye zonalarına planlaşdırılan yatırımlar müzakirə olunub.

Ö.Bolat bildirib ki, Ə.R.Ramadanın Türkiyə iş dünyası haqqında dərin biliyi iki ölkə arasındakı investisiya əlaqələrinin inkişafına əhəmiyyətli töhfə verəcək.

Danışıqlarda iştirak edən Türkiyədən iş adamları da regionda istehsalın və məşğulluğun artırılması ilə bağlı gözləntilərini, eləcə də uzunmüddətli investisiya planlarını bölüşüblər.