"Axios" xəbər portalının məlumatına görə, Prezident Donald Trampın administrasiyası Venesuelanın müvəqqəti hökuməti ilə ölkənin zəngin neft ehtiyatlarında ABŞ-nin pay alması barədə danışıqlar aparır.

Müzakirələr 90 milyard barel ehtiyatı olan 10-dan çox məhsuldar neft yatağını əhatə edir ki, bu da Venesuelanın ümumi 300 milyard barellik ehtiyatının təxminən üçdə birinə bərabərdir.

"Axios" xəbər portalının məlumatına görə, ABŞ-nin mülkiyyət payı müqabilində Amerika şirkətləri də daxil olmaqla özəl müəssisələr bu yataqları istismar edəcək və Venesuelaya daha çox neft gəliri qazandıracaq.

Danışıqlardan xəbərdar olan mənbələrə istinadən "Reuters" xəbər agentliyinin yaydığı digər bir məlumata əsasən, yaxın vaxtlarda imzalanaraq ictimaiyyətə açıqlana biləcək sazişin ABŞ hökumətinin Venesueladakı bir neçə neft yatağını Amerika şirkətləri tərəfindən istismar edilməsi üçün zəmanət altına almasını nəzərdə tutacağı gözlənilir.

Mənbələrdən biri bildirib: "Bu məsələ ABŞ və Venesuela hökumətləri tərəfindən ən yüksək səviyyədə müzakirə olunur".

Başqa bir mənbə isə, sazişin icrası üçün hüquqi model kimi "icarə" üsulunun nəzərdən keçirildiyini, yataqların hər birinin ABŞ istehsalçıları arasında bölünməsi məqsədilə daha sonra hərrac və ya tender keçiriləcəyini qeyd edib.

Venesuela dünyada təsdiqlənmiş en böyük neft ehtiyatlarına malikdir.

"Axios"un xəbərində vurğulanır ki, bu saziş ABŞ-nin strateji neft ehtiyatlarının son 40 ilin ən aşağı səviyyəsində olduğu bir vaxtda ölkənin neft ehtiyatlarını iki dəfədən çox artıracaq.

ABŞ-nin Venesuelanın keçmiş lideri Nikolas Maduronu hərbi əməliyyatla devirməsindən təxminən səkkiz ay sonra müvəqqəti prezident Delsi Rodriges ölkəni, xüsusilə də energetika sektorunu xarici investisiyalara açmağa çalışır.