ABŞ və İsrailin İrana qarşı müharibəsi yanacaq xərclərini artıraraq regional miqyasda Çinin elektrikli yük maşınlarına olan tələbatı sürətləndirib. Müharibədən sonrakı dörd ay ərzində Çinin ağır elektrikli yük maşınlarının ixracı iki dəfə artaraq 16 823 nəqliyyat vasitəsinə çatıb və bu ixracın yarısı Cənubi və Cənub-Şərqi Asiya ölkelerinin payına düşüb.
Sözügedən bölgələrə satışlar müvafiq olaraq beş dəfədən çox və təxminən üç dəfə artıb.
Yanacaq qiymətlərinin kəskin yüksəlməsi, xüsusilə Cənubi və Cənub-Şərqi Asiyada Çin istehsalı ağır elektrikli yük maşınlarına tələbatı sürətlə artırıb. Müharibə başlayandan bəri Şri-Lanka və Filippində dizel yanacağının qiymətindəki əhəmiyyətli artım Çin istehsalçıları üçün yeni bazarlar açıb və elektrikli yük maşınlarının ixracını sürətləndirib.
"Sany" kimi istehsalçılar daha əlverişli modellər hazırlayaraq Cənub-Şərqi Asiya bazarına yönəliblər. Yanacaq xərclərinin artması isə elektrikli yük maşınlarının özünüdoğrulma (xərclərini çıxarma) müddətini əhəmiyyətli dərəcədə qısaldıb.
Çində elektrikli yük maşınlarının ümumi yük maşını satışlarının 30%-ni təşkil etməsi elektrikli nəqliyyat vasitələrinə keçidin sürətlə yayıla biləcəyini göstərir.
Yüksək alış xərcləri və şarj infrastrukturunun çatışmazlığı əsas maneələr olaraq qalsa da, elektrikli yük maşınlarının aşağı istismar xərcləri və genişlənən şarj şəbəkələri bu problemlərin aradan qaldırılmasına imkan yaradır.
Mütəxəssislər neftin yüksək qiymətinin müəssisələri daha çevik qərarlar qəbul etməyə məcbur edəcəyini və elektrikli yük maşınlarının istifadəsinin növbəti dövrdə, xüsusən də Asiya, Afrika və Latın Amerikasında kəskin artacağını proqnozlaşdırırlar.
