Pakistan hökuməti əfqan qaçqınlarının geri dönüşünü təmin etmək məqsədilə “Torkham” nəzarət-buraxılış məntəqəsini yenidən açdığını təsdiqləyib. Rəsmilər noyabrın 1-də bildiriblər ki, iki həftədən çox bağlı qalan sərhədin açılması ilə minlərlə yolda qalmış insanların problemləri aradan qaldırılıb.
“Dawn” qəzetinin məlumatına görə, Pakistan rəsmiləri 11 oktyabrda sərhəd qüvvələri arasında baş verən toqquşmalar səbəbindən bağlanmış sərhədin qaçqınların geri qayıtması və ticarət üçün yenidən açıldığını təsdiqləyib. Əfqanıstanın Nangarhar vilayətinin məlumat və mədəniyyət idarəsinin rəhbəri Küreşi Badlun da sərhədin yenidən fəaliyyətə başladığını və Əfqanıstan vətəndaşlarının ölkələrinə dönüşünün artıq başladığını bildirib.
Xatırladaq ki, iki ölkə arasındakı sərhəd bu ayın əvvəlində Pakistan və Əfqanıstan əsgərləri arasında baş verən atışmadan sonra bağlanmışdı. Nəticədə “Nauşera” ilə “Torkham” arasındakı yolda yüzlərlə nəqliyyat vasitəsi və minlərlə qaçqın qida və suya çıxışı olmadan günlərlə yolda qalıb.
İstanbul görüşlərindən sonra gərginlik azalıb
Türkiyə və Qətərin vasitəçiliyi ilə oktyabrın 15-də əldə edilən müvəqqəti atəşkəsdən sonra iki ölkə arasındakı gərginlik azalmağa başlayıb. Əvvəlcə 48 saat davam etməsi planlaşdırılan atəşkəs Dohada keçirilən danışıqlardan sonra uzadılıb və tərəflər son sərhəd toqquşmalarını həll etməyə yönəlmiş addımlar atıblar.
14 saat davam edən görüşlərdən sonra hər iki tərəf atəşkəsin təfərrüatlarını müəyyənləşdirmək üçün texniki komitə yaradılması barədə razılığa gəlib. İlk iclasın 25 oktyabrda İstanbulda keçirilməsi planlaşdırılıb.
Qeyd edək ki, uzunluğu 2 min 670 kilometr olan Pakistan–Əfqanıstan sərhədində 18 rəsmi keçid məntəqəsi mövcuddur. Nangarhardakı “Torkham” və Qəndahardakı “Spin Boldak” nəzarət-buraxılış məntəqəsi isə ticarət və insan hərəkətliliyi baxımından ən çox istifadə olunan keçid məntəqələri sayılır. Xüsusən qeyd etmək lazımdır ki, sərhəd mühafizəçiləri arasında tez-tez baş verən silahlı qarşıdurmalar nəqliyyatı və ticarəti iflic vəziyyətinə salaraq, quru ilə əhatələnmiş Əfqanıstan iqtisadiyyatına ciddi zərbə vurur.
